وقارآباد ضلع میں فلمی انداز میں طوفان گاڑی کے ذریعہ موٹرسیکل کا تعاقب، ایک شخص کا قتل، 8 گرفتار : ضلع ایس پی کی پریس کانفرنس

وقار آباد ضلع میں فلمی انداز میں طوفان گاڑی کے ذریعہ موٹرسیکل کا تعاقب
ایک کلومیٹر تک گھسیٹ کر ایک شخص کا قتل، حادثہ قرار دینے کی کوشش ناکام
قتل کے لیے ایک لاکھ کی سپاری، 8 گرفتار، ضلع ایس پی کوٹی ریڈی کی پریس کانفرنس

وقارآباد : 07۔جولائی
(سحر نیوز ڈاٹ کام/نمائندہ)

وقار آباد ضلع پولیس نے فلمی انداز میں کیےگئے ایک شخص کےقتل جسے حادثہ قرار دینے کی کوشش کی گئی تھی کی کامیاب تحقیقات کے بعد اس قتل کی واردات میں ملوث 8 افراد کو گرفتار کرلیا ہے۔جس میں مقتول کے تین تایا زاد بھائی بھی شامل ہیں۔

اس فلمی انداز میں انجام دی گئی قتل کی واردات کی تفصیلات ایس پی ضلع وقارآباد نندیالا کوٹی ریڈی،آئی پی ایس کے مطابق وقارآباد ضلع کے مومن پیٹ منڈل کے لچھا نائیک تانڈہ کےساکن وٹھل کی 2 جولائی کو سڑک حادثہ میں موت ہوگئی تھی۔تاہم مہلوک وٹھل کی بیوی میگھاوت انیتا نے مومن پیٹ پولیس اسٹیشن میں ایک شکایت درج کروائی تھی کہ اس کےشوہر کی حادثہ میں موت واقع نہیں ہوئی ہے بلکہ اس کا قتل کرتے ہوئے اسے حادثہ کی شکل دینے کی کوشش کی گئی ہے۔

میگھاوت انیتا کی اس شکایت پرمومن پیٹ پولیس نے کرائم نمبر 113/2023 درج کرتےہوئےدفعات 302, 307 ,109, 120 (B) r/w 34 کے تحت ایک کیس درج رجسٹر کرلیا تھا۔

ضلع ایس پی نندیالا کوٹی ریڈی آئی پی ایس نے اس شکایت کے فوری بعد اس کیس کو حل کرنے کی غرض سے ایس ڈی پی او وقارآباد بی وی ستیہ نارائنا ایڈیشنل ایس پی وقارآباد کی قیادت میں سرکل انسپکٹر مومن پیٹ وینکٹیشم،وقارآباد ٹاون انسپکٹر سرینو۔سب انسپکٹران پولیس دھارور بھارت بھوشن نواب پیٹ، ارون مرپلی، آنند بنٹارام، وٹھل ریڈی مومن پیٹ اور ٹاسک فورس کے ساتھ خصوصی ٹیمیں تشکیل دیں۔

ان پولیس ٹیموں کی تیز رفتارتحقیقات کے دوران یہ حیرت انگیز انکشاف ہوا کہ تانڈہ میں اپنے دبدبہ کو قائم رکھنے اور ایک اراضی کے تنازعہ میں راستے سے ہٹانے کی غرض سے وٹھل کو گاڑی کے ذریعہ قتل کر دیا گیا اور اس کو حادثہ کی شکل دی گئی تھی۔ساتھ ہی یہ انکشاف بھی ہوا کہ لچھا نائیک تانڈہ کے ساکن تین بھائیوں میگھاوت پون،موتی لال اور نریندر کےعلاوہ مزید 5 افراد نے مل کرمنصوبہ بند طریقہ سے وٹھل کا قتل کیا تھا۔

2 جولائی کی دوپہر سداشیو پیٹ کی جانب سے وقارآباد شاہراہ پر موجود مومن پیٹ منڈل کےمیکاونم پلی کےقریب طوفان گاڑی سےوٹھل کی موٹر سیکل کو ٹکر دیتے ہوئے اس کا قتل کیا گیا تھا۔

ضلع ایس پی وقارآباد نندیالا کوٹی ریڈی آئی پی ایس نے بتایا کہ تحقیقات میں پتہ چلاہےکہ وٹھل نائیک کےقتل کے لیے سنگاریڈی ضلع کے کندی کے ساکن محمد سلمان کو ایک لاکھ روپئے کی سپاری دیتے ہوئے وٹھل کے قتل کا منصوبہ بنایا گیا تھا۔

ضلع ایس پی نے بتایا کہ گرفتار شدگان میں مقتول کے تین تایا زاد بھائی میگھاوت رام چندر،میگھاوت موتی لال اور میگھاوت نریندر(ساکن لچھا نائیک تانڈہ) کے علاوہ محمد سلمان(کندی،سنگاریڈی)،بھانووت جئے پال(کندی پور،سنگاریڈی)،جنجو راجو(سنگاریڈی)،منگلی نریش(سنگاریڈی)اور دیواسو رمیش(ساکن ظہیر آباد) شامل ہیں۔ جنہوں نے تفتیش کے دؤران جرم کو قبول کرتے ہوئے بتایا کہ کرناٹک کے رجسٹریشن کی حامل ایک طوفان گاڑی سے ٹکر دیتے ہوئے وٹھل کا قتل کیا گیا تھا۔

ضلع ایس پی وقارآباد نندیالا کوٹی ریڈی آئی پی ایس نے بتایاکہ ان تمام 8 گرفتار شدگان کو عدالتی تحویل میں بھیجاجارہا ہے۔ضلع ایس پی اندرون چار یوم اس قتل کے معاملہ کی کامیاب تحقیقات اور ملزموں کی گرفتاری پر پولیس کی خصوصی ٹیموں کو مبارکباد دیتے ہوئے عوام کو پیغام دیا کہ ان کے درمیان یا اراضیات کےمتعلق اگراختلافات موجود ہوں توانسانیت کا ثبوت دیتے ہوئے پولیس کی مدد سے انہیں حل کرلیں، قتل جیسے مجرمانہ واقعات کے ذریعہ ان مسائل کو حل نہیں کیا جاسکتا۔

2 جولائی کی دوپہر طوفان گاڑی سے وٹھل نائیک کی موٹرسیکل کو ٹکر دینے کے بعد ایک کلومیٹر دور تک تیز رفتاری کے ساتھ اس کوگھسیٹ کر لے جانے والا منظر اس سڑک پر موجود سی سی ٹی وی کیمرہ میں قید ہوگیا۔ جو اس ویڈیو میں دیکھا جاسکتا ہے۔

https://www.facebook.com/khanyahiya276/videos/2391793124361080