تلنگانہ میں کل 3 اپریل سے ایس ایس سی کے سالانہ امتحانات کا آغاز، تمام تیار یاں مکمل، زائد از 5 لاکھ طلبہ کی شرکت

تلنگانہ میں کل 3 اپریل سے ایس ایس سی کے سالانہ امتحانات کا آغاز
تمام تیار یاں مکمل، زائد از 5 لاکھ طلبہ کی شرکت، پانچ منٹ کی تاخیر قابل قبول
وقار آباد ضلع میں 74 امتحانی مراکز پر 13,727 طلبہ کی امتحانات میں شرکت

حیدرآباد/وقارآباد: 02/اپریل (سحرنیوزڈاٹ کام)

ریاست تلنگانہ میں کل 3 اپریل سے ایس ایس سی کےسالانہ امتحانات کا آغازہونے جا رہا ہے۔اس کےلیے سرکاری سطح پرتمام انتظامات مکمل کرلیے گئے ہیں۔اس سلسلہ میں 29 مارچ کو ریاستی وزیرتعلیم پی۔سبیتا اندرا ریڈی نےمحکمہ تعلیمات اور دیگرمتعلقہ عہدیداروں کے ساتھ ایک جائزہ اجلاس منعقد کرتے ہوئے ان امتحانات کے پرامن انعقاد اور طلبہ کو تمام سہولتوں کی فراہمی کی ہدایت دی تھی۔

بعدازاں وزیرتعلیم  پی۔سبیتا اندرا ریڈی نے بتایاتھاکہ جاریہ سال ریاست تلنگانہ کے 4 لاکھ 94 ہزار 620 طلباء وطالبات دسویں جماعت کے ان سالانہ امتحانات میں شرکت کریں گے۔ جن کا تعلق ریاست کے 11,456 سرکاری اور خانگی اسکولوں سے ہوگا۔ دسویں جماعت کے ان سالانہ امتحانات کا آغاز 3 اپریل بروز پیر سے ہوگا اور اختتام 13 اپریل بروز جمعرات کو ہوگا۔دسویں جماعت کے ان امتحانات کے لیے ریاست بھر میں جملہ 2,652 امتحانی مراکز قائم کیے گئے ہیں۔اور 144 سٹنگ اسکواڈ کا تقررعمل میں لایا گیا ہے۔

دسویں جماعت کےسالانہ امتحانات کے اؤقات 30-9 بجے صبح تا 30-12 بجے دوپہر تک ہونگے۔اس طرح ان امتحانات کا وقفہ تین گھنٹہ کا ہوگا ۔ جبکہ سائنس اور کمپوزٹ کے طلبہ کے لیے 20 منٹ زائد دئیے جائیں گے۔

جاریہ سال حکومت کی جانب سے امتحانی مراکز میں داخل ہونے کے لیے طلبہ کی پانچ منٹ کی تاخیر قابل قبول قرار دی گئی ہے اور اس کے بعد طلبہ کو امتحانات میں شرکت کی اجازت نہیں دی جائے گی۔

ریاست تلنگانہ میں دسویں جماعت کے ان سالانہ امتحانات میں شرکت کرنے والے طلبہ آر ٹی سی بسوں میں ہال ٹکٹ دکھا کر مفت سفر کرسکتے ہیں۔یاد رہے کہ جاریہ سال دسویں جماعت کے ان سالانہ امتحانات میں صرف 6 پرچہ سوالات ہی ہوں گےجبکہ قبل ازیں ان کی تعداد 11 ہوا کرتی تھی۔محکمہ تعلیمات کے مطابق جاریہ سال صد فیصد نصاب کی تکمیل کے بعد سالانہ امتحانات کا انعقاد عمل میں لایا جارہا ہے۔

ضلع وقارآباد میں بھی ایس ایس سی سالانہ امتحانات کے انعقاد کے لیے محکمہ تعلیمات کی جانب سے تمام تیاریاں مکمل کرلی گئی ہیں۔ ڈسٹرکٹ ایجوکیشن آفیسر (ڈی ای او) وقارآبادضلع رینوکادیوی نے بتایا کہ ضلع میں جملہ 74 امتحانی مراکز قائم کیےگئے ہیں۔جاریہ سال دسویں جماعت کے ان سالانہ امتحانات میں ضلع وقارآباد سے جملہ 13,727 طلبا و طالبات شرکت کریں گے۔جن میں 6,987 لڑکے اور 6,740 لڑکیاں شامل ہیں۔

ڈی ای او رینوکا دیوی نے کہاکہ گرما اور دیگر وجوہات کے پیش نظر تاخیر سے امتحانی مراکز پہنچنے والے طلبہ کے لیے پانچ منٹ کی چھوٹ دی گئی ہے۔اس کے بعد امتحان میں شرکت کی اجازت نہیں دی جائے گی۔

ڈی ای او وقارآبادضلع رینوکادیوی نے بتایاکہ ضلع کےامتحانی مراکز کے لیے 74 چیف سپر نٹنڈنٹ اور 74  ڈیپارٹمنٹل آفیسرس کو تربیت دی گئی اور امتحانات کے دوران ان کی خدمات سے استفادہ کیا جائے گا۔ جبکہ 898 انویجلیٹرس خدمات انجام دیں گے۔ڈی ای او وقارآباد ضلع رینوکا دیوی نے بتایاکہ اس سال دسویں جماعت امتحانات کے سالانہ امتحانات میں صرف 6 پرچہ سوالات ہونگے۔موسم گرما کے پیش نظر ہر امتحانی مرکز پر محکمہ میڈیکل کی جانب سے ایک اے این ایم کو رکھا جائے گا۔

ڈی ای او نے طلبہ کو مشورہ دیا ہےکہ اگر ان کے ہال ٹکٹ میں کچھ غلطیاں ہوں تو وہ ان سے ربط قائم کرتے ہوئے درست کرواسکتے ہیں۔انہوں نے بتایا کہ مواضعات اور دور دراز سے آنے والے طلبہ کی سہولت کے لیے آر ٹی سی بسوں کابھی انتظام کیا گیا ہے۔تمام امتحانی مراکز پر سی سی ٹی وی کیمرے بھی نصب کیےگئے ہیں اور امتحانی اوقات کے دوران تمام امتحانی مراکز کے اطراف دفعہ 144 نافذ العمل رہے گااور قریب میں موجود تمام زیراکس سنٹرس بند کروائے جائیں گے۔اور کسی کو بھی امتحانی مراکز میں سیل فون لے جانے کی اجازت نہیں ہوگی۔

ڈی ای او رینوکا دیوی نے بتایاکہ موسم گرما کےپیش نظر امتحانی مراکز میں طلبہ کو پینے کا پانی،برقی کی بلا وقفہ سربراہی اور دیگر درکار سہولتیں مہیا کروائی جائیں گی۔ڈی ای او رینوکا دیوی نے طلبہ کو مشورہ دیاکہ وہ امتحانی مراکز کو ایک گھنٹہ قبل ہی پہنچ جائیں تاکہ وہ کسی بھی طرح کے ذہنی دباؤ کےبغیر امتحان لکھ سکیں۔انہوں نےطلباء کویہ مشورہ بھی دیاکہ وہ بناء کسی ذہنی دباو کےاطمینان اور پرسکون انداز میں امتحان لکھتے ہوئے اعلی نشانات سے کامیابی حاصل کریں۔

یاد رہے کہ ریاست تلنگانہ میں موسم گرماکے پیش نظر ریاستی محکمہ تعلیمات کی جانب سے 15 مارچ تا 24 اپریل تمام سرکاری اور خانگی اسکولوں کے لیےنصف دن کا اسکول چلایاجارہاہے۔اول تا نویں جماعت کے سالانہ امتحانات 12 اپریل سے چونکہ چار مضامین پر مشتمل امتحانات منعقد ہونگے تو ان امتحانات کا اختتام 17 اپریل کو عمل میں آئےگا۔وہیں چھٹی تا نویں جماعت کےطلبہ کےسالانہ امتحانات 20 اپریل کو ختم ہونگے۔

وہیں ریاست تلنگانہ کے تمام سرکاری اور خانگی اسکولوں اور کالجس،اقامتی اسکولوں اور ہاسٹلوں کو 25 اپریل بروزمنگل سے 11 جون بروز اتوار تک جملہ 48 دنوں کی گرمائی تعطیلات ہوں گی۔اور 12 جون سے ریاست میں دوبارہ تمام تعلیمی اداروں کی کشادگی عمل میں لائی جائے گی۔