تلنگانہ اردو ورکنگ جرنلسٹس یونین کی اڈھاک کمیٹی کی تشکیل، انتخابات جلد
جنرل باڈی اجلاس میں فیصلہ، رکنیت سازی مہم کا فوری طور پر آغاز
مسائل کی یکسوئی کے لیے یونین سے وابستہ ہونے اردو صحافیوں سے اپیل
حیدرآباد: 22۔جنوری (پریس نوٹ/سحرنیوزڈاٹ کام)
تلنگانہ اردو ورکنگ جرنلسٹس یونین TUWJU# کی جنرل باڈی کا ایک اجلاس آج اے جے مینشن.شانتی نگر,حیدرآباد میں منعقد ہوا جس میں تلنگانہ کے تقریباً تمام اضلاع کے اردو صحافیوں اور نمائندوں نے شرکت کی۔جناب جمال شریف ایڈوکیٹ (نامہ نگار روزنامہ سیاست جنگاؤں) کی زیر صدارت منعقدہ اس اجلاس میں یونین کی ریاستی کمیٹی اور اضلاع کمیٹیوں کے انتخابات کے علاوہ دیگر امور پر غور و خوض کیا گیا۔
واضح رہےکہ یونین کی تشکیل 2017ء میں عمل میں لائی گئی تھی اور اتفاق رائےکے علاوہ جہاں ضرورت پڑے،انتخابات کے ذریعہ ریاستی کمیٹی کے ساتھ ساتھ اضلاع کمیٹیوں کے تمام عہدیداروں کا انتخاب عمل میں لا یا گیاتھا۔ان عہدوں پر عہدیداروں کا انتخاب دو سالہ مدت کے لیے عمل میں لایاگیاتھا۔تاہم کوروناوائرس کی وبا،لاک ڈاؤن اور اس سے متعلق مختلف وجوہات کے باعث یونین کے انتخابات دوبارہ منعقدنہیں کیے جاسکے تھے۔اب چونکہ حالات بہتر ہوچکے ہیں اور معمولات زندگی بڑی حد تک بحال ہوچکے ہیں تو یونین نےبھی انتخابات منعقد کرکےریاستی کمیٹی اور اضلاع کی کمیٹیوں کے علاوہ دیگر اہم کمیٹیوں کی تشکیل عمل میں لانے کا فیصلہ کیا ہے۔
اس سلسلہ میں آج منعقدہ جنرل باڈی اجلاس میں کافی غور و خوض اور تبادلہ خیال کے بعد ایک اڈھاک کمیٹی تشکیل دینے کا فیصلہ کرتے ہوئے فی الفور اس کی تشکیل عمل میں لائی گئی اور اتفاق رائے سے جناب شجاع الدین افتخاری،بیورو چیف روزنامہ اعتماد،حیدرآباد کو صدر اڈھاک کمیٹی،تلنگانہ اردو ورکنگ جرنلسٹس یونین منتخب کرلیا گیا۔جبکہ جناب ساجد معراج، پی ایچ ڈی (لاء) ریسرچ اسکالر اور (گورنمنٹ ٹیچر) کو اعزازی سرپرست مقرر کیا گیا۔
اڈھاک کمیٹی میں ریاست تلنگانہ کے تمام قدیم متحدہ اضلاع سے کم از کم ایک نمائندہ کو جگہ دی گئی ہے اور جملہ 10 ارکان کا ندائی ووٹوں کے ذریعہ انتخاب عمل میں لایا گیا۔جن میں جناب جمال شریف(متحدہ ضلع ورنگل)،جناب سعید محی الدین(متحدہ ضلع ورنگل)،جناب نثار احمد (متحدہ ضلع کریم نگر)،جناب مفتی رئیس الدین قاسمی(متحدہ ضلع عادل آباد)،جناب سید یٰسین علی(متحدہ ضلع نظام آباد)،جناب محمدمتبع علی خان(حیدرآباد)، جناب محمد کریم الدین(متحدہ ضلع میدک)،جناب اشفاق احمد(متحدہ ضلع نلگنڈہ)،جناب علیم الدین(متحدہ ضلع نظام آباد)اور جناب محمد رفیع ذکی (متحدہ ضلع محبوب نگر) شامل ہیں۔
اڈھاک کمیٹی کو تمام کمیٹیوں کے انتخابات کے انعقاد کے علاوہ قانونی و دیگر متعلقہ امور کی دیکھ بھال کی ذمہ داری سونپی گئی ہے جس کے لیے کمیٹی کو اندرون و بیرون یونین،ضروری اقدامات کےسلسلہ میں تمام اختیارات تفویض کیےگئے ہیں۔جنرل باڈی اجلاس میں فوری طور پر یونین کی رکنیت سازی مہم کا احیاء کرنے کا بھی فیصلہ کیا گیا ہے۔
تلنگانہ اردو ورکنگ جرنلسٹس یونین ریاست کے تمام اردو صحافیوں کی فلاح و بہبود کے لیے کوشاں ہے اور ریاست کے اردوصحافیوں سے اپیل کرتی ہے کہ وہ زیادہ سے زیادہ تعداد میں یونین کی رکنیت حاصل کرکے اردو صحافت سے اپنی وابستگی اور اس کی ترقی کے لیے اپنی سنجیدگی کا ثبوت دیں تاکہ ہر ایک اردوصحافی کو اس کا جائز حق حاصل ہوسکے۔یہ یونین ہر ایک اردو صحافی کو اس کاجائز حق دلوانے کےلیے ماضی کی طرح اپنی جدوجہد اور عزم کا اعادہ کرتی ہے۔
