اننت گیری ہلز کی پہاڑیوں میں کار اور موٹرسیکل، ریس محکمہ پولیس اور جنگلات کے عہدیدار مصروف تحقیقات، چند گاڑیوں کی شناخت

وقارآباد ضلع : اننت گیری ہلز کی پہاڑیوں میں کار اور موٹرسیکل ریس
محکمہ پولیس اور جنگلات کے عہدیدار مصروف تحقیقات، چند گاڑیوں کی شناخت
قانونی کارروائی اور مزید سخت بندوبست کیا جائے گا : ضلع ایس پی کوٹی ریڈی کا بیان

حیدرآباد/وقارآباد : 16۔اگست
(سحرنیوز ڈاٹ کام/نمائندہ)

وقارآباد ضلع مستقر سے 6 کلومیٹر کے فاصلہ پر موجود سیاحتی علاقہ اننت گیری ہلز میں کل یوم آزادی کی تعطیل کے موقع پر بشمول حیدرآباد مختلف مقامات سے سیاحوں کی بڑی تعداد پہنچی تھی۔لیکن اسی دؤران کل سیاحت کی غرض سے آنے والے چند نوجوانوں نے اننت گیری ہلز کے جنگلات اور پہاڑیوں میں کاروں اور موٹر سیکلوں کی ریس کے ذریعہ سیاحوں کو خوفزدہ کردیا۔اس علاقہ کے عوام اور سیاحوں کا مطالبہ ہے کہ ایسی سرگرمیوں میں حصہ لینے والے ان نوجوانوں کے خلاف کارروائی کی جائے اور ایسی جان لیوا سرگرمیوں پر سخت پابندی عائد کی جائے۔

کل جب پولیس اور محکمہ جنگلات کے عہدیدار یوم آزادی کی تقاریب میں مصروف تھے تومختلف مقامات سے آئے ہوئے نوجوانوں کی بڑی تعداد نے 10 بجے صبح سے دوپہر ایک بجے تک اننت گیری ہلز کے اہم مقام جہاں کی بلندی سے پورے اننت گیری ہلز کے جنگلات کا نظارہ کیا جاتا ہے View Point# پر کاروں, جیپ اور موٹرسیکلوں کے ذریعہ خوفناک کرتب کرتےہوئے اور ایک دوسرے کےساتھ ریس لگاتےہوئےسیاحوں اور مقامی لوگوں کو خوف میں مبتلاء کردیا۔ویڈیو میں دیکھاجاسکتا ہےکہ اس ریس کے دوران ایک ہجوم موجود ہے اور باقاعدہ اس کی ویڈیو گرافی بھی کی جا رہی ہے۔

مختلف گاڑیوں کے ذریعہ کرتب بازی کے ذریعہ ان نوجوانوں نے اس پورے علاقے میں کاروں اور جیپوں کو گول گول گھماتے ہوئے اور موٹر سیکلوں کے ذریعہ کثیف دھواں اڑاتےہوئے سائلنسروں کی آوازوں اور چیخ پکار سے پورا علاقہ گرد و غبار اور چیخوں اور دھویں میں غرق کر دیا تھا۔اطلاع ہے کہ اس کے لیے ان نوجوانوں نے پولیس اور محکمہ جنگلات سے کوئی اجازت بھی نہیں لی تھی۔ایک صاف و شفاف سیاحتی، جنگلاتی اور سیاحتی مقام پر یہ حرکتیں غیر قانونی ہیں۔ 

اس ریس کے اچانک انعقاد اور نوجوانوں کی غیر ذمہ داری کےمظاہرہ پر ایس پی وقارآبادضلع نندیالا کوٹی ریڈی آئی پی ایس نے کہاہے کہ کل محکمہ پولیس اور جنگلات کےعہدیدار اور ملازمین یوم آزادی کی تقاریب اور پریڈ وغیرہ میں مصروف تھےکہ ان نوجوانوں نے اننت گیری ہلز پر کار اور موٹرسیکل ریس منعقد کرتے ہوئے مقامی عوام اور سیاحوں کو خوفزدہ کیا اور اس پرسکون ماحول کو آلودہ کیا جو کہ غیر قانونی عمل ہے۔

ضلع ایس پی وقارآباد این۔کوٹی ریڈی آئی پی ایس نے کہاکہ اننت گیری ہلز پر لگاتار پٹرولنگ کی جاتی ہے۔انہوں نےبتایا کہ اس واقعہ کی تفصیلی تحقیقات کی جارہی ہیں،مذکورہ مقامات اور واقعہ کے ویڈیوز اور سی سی ٹی وی کیمرہ فوٹیج کے ذریعہ چند نوجوانوں اور گاڑیوں کی شناخت کرلی گئی ہے جن کے خلاف قانونی کارروائی کی جائے گی۔ایس پی ضلع وقارآباد نندیالا کوٹی ریڈی آئی پی ایس نے نوجوانوں کومتنبہ کیا کہ ایسی حرکتوں کے خلاف سخت قانونی کارروائی کی جائے گی۔ضلع ایس پی نے کہاکہ اب اننت گیری ہلز پر مزیدسخت بندوبست کیا جائے گا۔جہاں سیاح اپنے افراد خاندان کے ساتھ سیاحت کی غرض سے آتے ہیں۔

اطلاعات کےمطابق پولیس کی ابتدائی تحقیقات میں انکشاف ہوا ہےکہ اس ریس میں 30 کاریں اور 70 موٹر سیکلیں شامل تھیں،جن کے نمبرات کے ذریعہ ان کے مالکین کا پتہ لگایا جارہا ہے۔اور ان سب کے علاوہ اس کار اور موٹرسیکل ریس کا اہتمام کرنےوالوں کے خلاف قانونی بھی کارروائی کی جائے گی۔

دراصل قدرتی رنگینیوں اور قدرتی نظاروں سے بھرپور،آنکھوں اور ذہن کو تر و تازہ کرنےوالے لائق دید نظاروں سے بھرپور اننت گیری ہلز جو کہ ریاست تلنگانہ کے دارالحکومت حیدرآباد سے 70 کلومیٹر اور وقارآباد ضلع مستقرسے 6 کلومیٹر کے فاصلہ پرمؤجود ہے۔3,762 ایکڑ جنگلاتی علاقہ پر محیط اننت گیری ہلز سے ہی سےمشہور تاریخی موسیٰ ندی کا آغاز ہوتا ہے جو حیدرآباد کے درمیان سے بہتی ہے۔

https://www.facebook.com/khanyahiya276/videos/2948156661984934

اننت گیری ہلز تلنگانہ کے اوٹی کے طور پر مشہور ہے۔اور یہ محکمہ جنگلات وقارآباد کے دائرہ کار میں آتا ہے۔اننت گیری سیاحوں کے لیے ایک محفوظ مقام مانا جاتا ہے۔جہاں سیاحت کی غرض سے بشمول حیدرآباد، ریاست تلنگانہ کے مختلف مقامات کے علاوہ پڑوسی ریاست کرناٹک کے دیگر مقامات سے سیاحوں کی بڑی تعداد پہنچتی ہے۔بالخصوص تعطیلات کے مواقع پر یہاں سیاحوں کا ہجوم دیکھا جاتا ہے۔اننت گیری ہلز پر محکمہ جنگلات اور پولیس کی جانب سے لگاتار گشت بھی کی جاتی ہے اور مختلف مقامات پر سی سی کیمرے بھی نصب ہیں۔

” یہ بھی پڑھیں "

راہول گاندھی سے ٹماٹر کی قیمت سے بے بس ہوکر رونے والے سبزی فروش کی ملاقات، لنچ پر مدعو، سوشل میڈیا پر وائرل ہوا تھا ویڈیو

وقارآباد کے قریب موجود تلنگانہ کے اوٹی اننت گیری ہلز پر بارش کے دوران دلکش نظارے، آبشار جاری، سیاحوں کا ہجوم