گوہاٹی کے کنٹونمنٹ گراؤنڈ میں ایک جنگلی ہاتھی فٹ بال کھیلنے پہنچ گیا
کھلاڑی گراؤنڈ سے ہٹ گئے، ہاتھی تنہا فٹ بال سے کھیل کر واپس
گوہاٹی: 27۔ستمبر
(سحرنیوزڈاٹ کام/سوشل میڈیا ڈیسک)
جاریہ ماہ 15ستمبر کو سابق چیف منسٹر اتراکھنڈ تری ویندرسنگھ راوت اور ان کے ساتھ موجود ان کےسیکورٹی گارڈز،پارٹی قائدین اور صحافیوں کو اس وقت نصف گھنٹہ تک ایک چٹان پر چڑھ کر ایک جنگلی ہاتھی سے اپنا بچاؤ کرنا پڑا تھا۔جس نے ہائی وے پر ان کی گاڑیوں کا قافلہ روک دیا تھا۔اس بپھرے ہوئے ہاتھی کے تیور دیکھ کرسابق چیف منسٹر اور ان کے ساتھ موجود تمام لوگوں نے اپنی اپنی گاڑیوں سے اتر کر چٹان پر پناہ لی تھی۔بعدازاں محکمہ جنگلات کو اس کی اطلاع دی گئی توعہدیداروں اور ملازمین نے جائے مقام پر پہنچ کر ہوائی فائرنگ کے ذریعہ اس ہاتھی کو جنگل میں واپس بھیج دیا تھا۔
وہیں کل ایک جنگلی ہاتھی نے آسام کے گوہاٹی میں ایک نارینگی آرمی کنٹونمنٹ علاقہ میں موجود فوجی کیمپ کے گراؤنڈ میں فٹ بال کھیلنے والے میں مصروف افراد کو اس وقت حیران کردیا جب وہ جنگل سے نکل کر باقاعدہ آہستہ آہستہ سڑک پر چلتے ہوئے میدان میں داخل ہوا۔اس بلند قامت،بھاری بھرکم ہاتھی نے مختصر طور پر تنہا فٹبال سے بھی کھیلا۔
سوشل میڈیا پر بڑے پیمانے پر وائرل ہونے والی اس ایک منٹ 38 سیکنڈ کے ویڈیو میں دیکھاجاسکتا ہےکہ یہ ہاتھی کھیل میں شامل ہونے کا فیصلہ کرنے سے قبل سڑک عبور کرکے انتہائی سکون کےساتھ گراؤنڈ میں داخل ہورہاہے۔مقامی لوگوں کاکہنا ہے کہ آسام میں ہاتھیوں کی بہت سی گزر گاہیں ہیں اور ہوسکتا ہے کہ یہ ہاتھی کھانے کی تلاش میں قریبی امچانگ وائلڈ لائف سینکچری سے آیا ہوگا۔ آسام میں جنگلی ہاتھیوں کے جھنڈ کو شاہراہوں پر بھٹکتے دیکھنا عام بات ہے۔
اس بن بلائے خوفناک مہمان کو گراؤنڈ میں آتا دیکھ کر کھیل میں مصروف کھلاڑی میچ روک دیتے ہیں اورجنگلی ہاتھی سےخود کو بچانے کے لیے میدان سے دورہٹ جاتے ہیں۔ہاتھی اس فٹ بال گراؤنڈ میں داخل ہونےسےقبل سڑک کے کنارے فٹ پاتھ پر موجود مٹی کو اپنی سونڈ سے کھینچ کر اپنی پیٹھ پر انڈیل لیتا ہے۔
کھلاڑیوں سے خالی ہوجانے والے اس گراؤنڈ میں پڑے ہوئے ایک فٹ بال سے یہ ہاتھی اپنے پچھلے پیروں سےدوبار ڈھکیل کر کھیلنے کی کوشش کرتا ہے۔بعدازاں چہل قدمی والے انداز میں وہاں سےجاتے جاتے یہ ہاتھی دومرتبہ اپنی سونڈھ اٹھاتا ہوا نظر آیا کہ جیسے اسے گراؤنڈ میں آتا ہوا دیکھ کر دور ہٹ جانے والے کھلاڑیوں کوالوداع کہہ رہا ہو۔!!
