ٹوئٹر نے کنگناراناوت کا اکاؤنٹ مستقل طور پر بند کردیا
نئی دہلی:04مئی(سحرنیوزڈاٹ کام)
سوشیل میڈیا بالخصوص ٹوئٹر پر ہر معاملہ میں مذہبی منافرت کو ہوا دینے والی، ممتاز و مشہور فلمی اور سیاسی شخصیتوں بشمول اپنے قدیم عاشق فلم اداکار ہرتیک رؤشن کی تضحیک کرنے میں ماہر اور انتہائی متنازعہ مانی جانے والی کنگناراناوت کے ٹوئٹر اکاؤنٹ کو آج ٹوئٹر نے مستقل طورپر بند کردیا ہے۔
مغربی بنگال میں بی جے پی کی شکست اور اسکے بعد ہونے والے تشدد کے واقعات کو لیکر اُکسانے والے ٹوئٹ کررہی تھیں جسے دیکھتے ہوئے ٹوئٹر نے آج یہ اہم فیصلہ کیا ہے جبکہ کئی معاملات میں منہ پھٹ عورت کی شبیہ کی حامل کنگناراناوت کے ٹوئٹس کے خلاف صارفین نے بارہا مرتبہ ٹوئٹر سے شکایت کی تھی جسکے بعد خود کنگنا راناوت نے اپنے کئی ٹوئٹ ڈیلیٹ کردئیے تھے یا پھر ٹوئٹر نے شکایت پرانکے متنازعہ ٹوئٹس کو ڈیلیٹ کردیا تھا۔
دراصل کل سواپن داس گپتا نے ٹوئٹ کرتے ہوئے لکھا تھا کہ مغربی بنگال کے بیر بھوم ضلع کے نانور میں بی جے پی کے تائیدی ہزاروں ہندؤوں کو مارا پیٹا جارہا ہےاور ہندو خود کو بچانے کیلئے گاؤں سے فرار ہونے اور چھپنے پر مجبور ہیں۔
اس ٹوئٹ کو ری ٹوئٹ کرتے ہوئے کل رات دس بجے کنگنا راناوت نے بنگال میں صدر راج کا نفاذکے ہیاش ٹاگ کیساتھ انتہائی قابل اعتراض ٹوئٹ کرتے ہوئے لکھا تھا کہ غنڈوں کو ختم کرنے کیلئے ہمیں سوپر غنڈوں کی ضرورت ہے ساتھ ہی کنگنا راناوت نے اس ٹوئٹ میں لکھا کہ مودی جی اپنا 2000ء والا ویراٹ کا روپ دکھائیں!
اس سے قبل مغربی بنگال کے انتخابی نتائج کے دؤران بی جے پی کی شکست کے بعد کنگنا راناوت نے ایک اُکسانے والا ٹوئٹ کرتے ہوئے لکھا تھا کہ بنگلہ دیشی اور روہنگیائی ممتا بنرجی کی سب سے بڑی طاقت ہیں۔جس سے محسوس ہوتا ہے کہ ہندواکثریت میں نہیں ہیں۔ کنگنارانا و ت نے اپنے اسی ٹوئٹ میں لکھا تھا کہ اطلاع ہیکہ بنگالی مسلمان غریب ہیں ۔شاباش ! دوسرا کشمیر تیار ہورہاہے! جس پر کل ہی ترنمول کانگریس کے ایک لیڈر نے مغربی بنگال میں کنگنا راناوت کے خلاف پولیس میں کیس درج کروایا ہے۔ جبکہ اس سے قبل مشہور شاعر و فلمی شخصیت جاوید اختر کے خلاف بھی ٹوئٹر پر الزامات عائد کیے جانے کے بعد جاوید اختر کنگناراناوت کیخلاف عدالت سے رجوع ہوئے ہیں۔
کنگناراناوت کے ٹوئٹراکاؤنٹ کو مستقل طورپر بندکرنے کے بعد ٹوئٹر نے اپنے پیغام میں لکھا ہے کہ وہ اس سائٹ پر کسی کو بھی کسی بھی طرح کی منافرت پھیلانے یا تشدد کو ہوا دینے کی اجازت نہیں دی جائے گی۔
کنگنا راناوت جس کے ٹوئٹر اور فیس بک پر لاکھوں فالوورس ہیں نے ٹوئٹر سے معطل ہونے کے بھی ڈھٹائی کیساتھ الزام عائد کیا ہے ٹوئٹر والے امریکی گورے ہیںاور وہ دیگر سوشیل میڈیا پلیٹ فارمس کے ذریعہ اپنی روِ ش پر قائم رہیں گی اور اپنی بات رکھیں گی۔
