مشتعل یا متشدد نہ ہوکر اپنے حقوق کے لیے جدوجہد کریں
سماجی تعلقات کے بغیر سماجی یکجہتی کا استحکام ممکن نہیں
ایس آئی او تلنگانہ کی ریاستی کانفرنس کے اختتامی سیشن سے
بیرسٹر اسد الدین اویسی،مولانا حامدمحمد خان،ڈاکٹر طلحہ فیاض الدین اور دیگر کا خطاب
حیدرآباد: 23۔اکتوبر
(سحرنیوزڈاٹ کام/پریس نوٹ)
اسٹوڈنٹس اسلامک آرگنائزیشن آف انڈیا (ایس آئی او) حلقہ تلنگانہ کی عظیم الشان ریاستی کانفرنس کا آخری اور مرکزی سیشن”استعداد سازی اور مستقبل کی راہیں” آج اختتام کو پہنچا۔ہزاروں افراد بشمول اطفال،طلبہ و طالبات،پروفیشنلز،ڈاکٹرز، طلباء،اساتذہ اور مرد و خواتین وغیرہ نے اس کانفرنس کے اُمید افزاء پیغام "شمع تغیر” سے استفادہ کیا۔
برادر قیام الدین(ریاستی سیکریٹری،ایس آئی او تلنگانہ)نے تنظیم ایس آئی او کےچالیس سالہ سفر کاتعارف کرواتےہوئے اس کےاثرات وخدمات کو بیان کیا۔جناب محی الدین شاکر(مرکزی سیکریٹری،جماعت اسلامی ہند)نے” آگہی،انسانی وقار کی بحالی”پر اپنےخطاب میں یہ بات باور کروائی کہ اصلاً "آگہی یہ ہے کہ انسان اپنا مقصد و مقام محسوس کرے اور راستہ یہ ہے کہ وہ اللہ کا اطاعت گزار بن جائے۔”
جناب کےکے سہیل (سابق قومی صدر ایس آئی او)نے کانفرنس کےتعمیری موضوع "استعداد سازی” پرمفصل گفتگو کی،نوجوانوں کوتعلیمی بلندیوں اور تخلیقی صلاحیتوں کو ابھارنے کی جانب راغب کیا اور والدین کو ان کی طرز تربیت کو ابھارنے اور جدید اسلوب میں ڈھالنے کی تلقین کی۔
ڈاکٹر طلحہ فیّاض الدین (ریاستی صدر،ایس آئی او تلنگانہ) نے”وہ صبح ہم ہی سے آئے گی” کےموضوع پر حرکت پذیر بیان دیا اور نوجوانوں کو 6 نکاتی لائحہ عمل تجویز کیا۔ایمان میں پختگی،شخصیت میں نکھار،داعیانہ کردار،تعلیمی معیار،صلاحیتوں میں ارتقاء اور حساسیت کا اظہار وغیرہ۔
صدر کل ہند مجلس اتحادالمسلمین و رکن پارلیمان حیدرآباد بیرسٹر اسد الدین اویسی نے” باشعور شہری،ایک حساس سماج کی طرف” کے عنوان کے تحت اظہارِ خیال کہا کہ سماج میں شعور بیداری کی ضرورت ہے اور اپنے آپ کو چوکنا رکھنے کی ضرورت ہے۔انہوں نے کہا کہ اس کا مطلب یہ نہیں ہیکہ ہم مشتعل یا متشدد ہوجائیں،بلکہ ہم اپنے حقوق کےحصول کی جدوجہد کے سلسلہ چوکنا رہیں۔حکومت کی جانب سے دبانے کی کوشش کی جائے گی لیکن ہم کو مایوس ہونے کے بجائے ایک ذمہ دار شہری کی ذمہ داری ادا کرنی چاہئے۔بیرسٹر اویسی نے ایس آئی او کو اس کامیاب کانفرنس کے انعقاد پر مبارکباد پیش کی۔
صدارتی خطاب بعنوان "تعلقات،سماجی یکجہتی کا استحکام” کو مولانا حامد محمد خان،امیر جماعت اسلامی ہند تلنگانہ نے پیش کرتے ہوئے یہ بات واضح انداز میں بیان کیا کہ سماجی تعلقات کے بغیر سماجی یکجہتی کا استحکام ممکن نہیں ہے۔ایس ایس آئی او کے چالیس سال مکمل ہونے پر انہوں مبارکباد پیش کی اور اقبال کا جلوہ آفرین شعر جوانوں کی نذر کیا کہ؎
عقابی شان جب بیدار ہوتی ہے جوانوں میں
نظر آتی ہے ان کو اپنی منزل آسمانوں میں
برادر حافظ حماد الدین نے اظہار تشکر کے ساتھ کانفرنس کے اختتام کا اعلان کیا اور حیدرآباد کے افراد تنظیم کی غیرمعمولی محنت و مشقت کو خراج تحسین پیش کیا۔جس کی وجہ سے کانفرنس کامیابی کے ساتھ اپنی منزلیں طے کر پائی۔آخر میں ایس آئی او تلنگانہ کی جانب سے تیار کردہ کتابچہ "لا گائیڈ” کا سرپرست حلقہ ایس آئی او تلنگانہ و صدر حلقہ ایس آئی او تلنگانہ مہمانان کے ہاتھوں رسم اجرا عمل میں لایا گیا۔
