جاریہ سال بھی بیرونی عازمین کو حج کی اجازت نہیں
حج 60 ہزار اندرون ملک کے عازمین تک محدود
مکہ مکرمہ :12۔جون (سحرنیوزڈاٹ کام)
سعودی عرب کی وزارت حج و عمرہ نے جاریہ سال فریضہ حج کی ادائیگی اندرون ملک کے عازمین تک محدود کرنے کا فیصلہ کیا ہے۔
وزارت کے اعلان کے مطابق سال رواں کے حج میں صرف 60 ہزار سعودی شہریوں اور مقیم غیر ملکیوں کو فریضہ کی ادائیگی کی اجازت ہوگی۔
دنیا بھر میں کورونا وبا کی صورتحال اور وائرس کی نئی شکلیں ظاہر ہونے کے باعث فریضہ کی ادائیگی اندرون ملک کے عازمین تک محدود کرنے کا فیصلہ کیا گیا ہے۔
وزارت نے کہا ہے کہ 18 سال سے 65 سال کی عمر کے ان عازمین کو حج کی اجازت ہوگی جنہوں نے کورونا ویکسین لے لی ہو وزارت حج و عمرہ اس بات پر زور دیتی ہے کہ سعودی حکومت کے نزدیک عازمین حج کی سلامتی اولین ترجیح ہے۔
انسانی جانوں کی سلامتی کا تحفظ اسلامی شریعت کا بھی اولین اصول ہے۔عالمی وبا کے باعث مشاعر مقدسہ میں بڑی بھیڑ لگانا اور ان میں سلامتی کے اصولوں کا انطباق کرنا انتہائی مشکل کام ہے لہٰذا تمام تر صورتحال اور خدشات کا جائزہ لینے کے بعد فیصلہ کیا گیا ہے کہ جاریہ سال بھی اس فریضہ کی ادائیگی کو محدود کیا جائے گا۔
دوسری جانب یہ بھی فیصلہ کیا گیا ہے کہ اندرون ملک سے حج کے خواہشمند آن لائن طریقہ سے حج کی درخواست جمع کروائیں گے۔وزارت حج نے کہا ہے کہ جاریہ سال حج کے لئے جن ضوابط کا اعلان کیا جارہا ہے وہ اس طرح ہیں کہ خواہشمند سعودی شہری ہوں یا سعودی عرب میں مقیم کسی بھی ملک سے تعلق رکھنے والے غیر ملکی ہوں، خواہشمند صحت مند اور توانا ہو اور کسی بھی قسم کی مستقل بیماریوں میں مبتلا نہ ہو۔
خواہشمند کی عمر 18 سے 65 سال کے درمیان ہو اور کورونا ویکسین حاصل کرچکا ہو۔ ” توکلنا” ایپلی کیشن اس کا سٹیٹس دو خوراکیں، ایک خوراک کو 14 دن ہوگئے یا وائرس کا شکار ہونے کے بعد ویکسین لگوانے والے ظاہر ہو رہے ہوں۔
وزارت نے کہا ہے کہ حج کے لئے مذکورہ بالا ضابطوں کی پابندی خود عازمین حج کی سلامتی اور ان کے اپنے ملکوں کے تحفظ کے لئے ہے۔
بشکریہ : کویت اردو نیوز
