سی ای آئی آر پورٹل کی مدد سے اب مسروقہ یا گمشدہ موبائل فونس کی واپسی یقینی, وقارآباد ضلع پولیس نے 8 فون برآمد کرلیے

سی ای آئی آر پورٹل کی مدد سے اب مسروقہ یا گمشدہ موبائل فونس کی واپسی یقینی
وقارآباد ضلع پولیس نے 8 مختلف افراد کے موبائل فون برآمد کرکے حوالے کیے
ضلع ایس پی کوٹی ریڈی نے متاثرین کو پورٹل سے استفادہ کا مشورہ دیا

حیدرآباد/وقارآباد : 28/ا پریل
(سحرنیوزڈاٹ کام/نمائندہ)

چوری شدہ یا گمشدہ موبائل فونس مالکین کے لیے اب مرکزی حکومت کے ڈپارٹمنٹ آف ٹیلی کمیونیکشن کی جانب سے متعارف کردہ ویب پورٹل سی ای آئی آر(CEIR#) Central Equipment Identity Register ایک نعمت ثابت ہورہی ہے۔جس کی تلنگانہ میں خدمات کا 16 اپریل سے آغاز ہوگیاہے۔اس پورٹل کی مدد سےمحکمہ پولیس مسروقہ یا گمشدہ موبائل فونس کو برآمد کرکے ان کےمالکین کےحوالے کرنے میں مصروف ہے۔ وقارآباد ضلع پولیس نے جاریہ ماہ اپریل میں ہی اب تک زائد 8 موبائل فونس برآمد کرکے ان کے مالکین کے حوالے کیے ہیں۔

ایس پی ضلع وقارآباد مسٹر این۔کوٹی ریڈی آئی پی ایس کے ہاتھوں مختلف اوقات میں اپنے موبائل سےمحروم ہوجانےوالے فون مالکین کو ایک ہی دن ان کے فون برآمد کرکے کل حوالے کیے گئے۔

تفصیلات کےمطابق وقارآبادضلع کے دوما پولیس اسٹیشن کے حدود میں موجود مختلف مواضعات کے بندیا،پروین ریڈی،مہیش کمار،رمیش، گووردھن اور رمیش کے موبائل فون گم ہوگئے تھے یا سرقہ کرلیے گئے تھے۔جس کی تحریری شکایت ان تمام نے چند ماہ قبل دوما پولیس اسٹیشن میں درج کروائی تھی۔

شکایات موصول ہونےکے بعد تلنگانہ میں سی ای آئی آر پورٹل http://www.ceir.gov.in کی خدمات کےآغاز کےبعد سب انسپکٹر پولیس دوما پولیس اسٹیشن وشواجن نے اس پورٹل کو لاگ ان کرکے ان مسروقہ یا گمشدہ موبائل فونس کی تفصیلات اپ لوڈ کر دیں۔

بعدازاں سب انسپکٹر پولیس نے وقارآباد ضلع کی آئی ٹی کور ٹیم کےعہدیداروں سے ربط قائم کرتے ہوئے ان کی مدد سے بہت کم وقت میں ان تمام 6 مسروقہ موبائل فونس کی شناخت کرتےہوئے انہیں برآمد کرلیا گیا۔اور کل ان تمام مالکین کو ان کے موبائل فونس ایس پی ضلع وقارآباد مسٹر این۔کوٹی ریڈی آئی پی ایس کے ہاتھوں حوالے کر دئیے گئے۔گذشتہ ہفتہ بھی ایک موبائل فون برآمد کرکے مالک کے حوالے کیا گیا۔

اس موقع پر ضلع ایس پی نے عوام کو مشورہ دیا کہ اگر ان کا موبائل فون چوری ہوجاتا ہے یا گم ہوجاتا ہے تو وہ www.ceir.gov.in پورٹل کو کلک کرکے اس پر تمام تفصیلات درج کر دیں۔جس کےذریعہ ان موبائل فونس کو برآمد کیا جاسکتا ہے۔موبائل فونس کے حاصل ہونے کے بعد خوش نظر آنے والے موبائل فون مالکین نے سی ای آئی آر پورٹل کے ذریعہ ان کے موبائل فونس کا سراغ لگاکر انہیں واپس دلانے پر ایس پی ضلع وقارآباد،سب انسپکٹر پولیس دوما اور آئی ٹی کور ٹیم کے عہدیداروں کا شکریہ ادا کیا۔

اسی طرح دو دن قبل بھی تانڈور پولیس نے دو ماہ قبل چوری کیاگیا ایک موبائل فون اسی سی ای آئی آر پورٹل کی مدد سےبرآمد کرکے اس کے ملاک کے حوالے کیا۔سرکل انسپکٹر پولیس تانڈور اربن راجندر ریڈی نے بتایا کہ تلنگانہ ہائی کورٹ کے وکیل لکشمی گاری انجنئیلو مدیراج 5 فروری کو تانڈور آئےتھے۔اسی دوران نامعلوم افرادنے ان کا Vivo-75 (5G) موبائل فون کا سرقہ کرلیاتھا۔اسی دن موبائل فون مالک نےتانڈور پولیس اسٹیشن میں موبائل کے سرقہ کی شکایت درج کرواکر حیدرآباد روانہ ہوگئے۔

تانڈور پولیس نےای سی ای آئی پورٹل پراس مسروقہ موبائل فون کی تمام تفصیلات اپ لوڈ کیں تو فوری مسروقہ موبائل فون کی تفصیلات پورٹل کے ذریعہ حاصل ہوئیں۔جس کےبعد پولیس نے اس موبائل فون کاسراغ لگاکر اسے برآمد کرلیا اورلکشمی گاری مدیراج ایڈوکیٹ کو اس کی اطلاع دی۔تاہم مصروفیت کےباعث وہ فوری تانڈور نہیں پہنچے۔دو دن قبل انہوں نے تانڈور پولیس اسٹیشن پہنچ کر اپنا موبائل فون حاصل کرلیا ان کے اس مہنگے موبائل فون کی برآمدگی پر ایڈوکیٹ مدیراج نے تانڈور پولیس کا شکریہ ادا کیا۔

اس موقع پر سرکل انسپکٹر پولیس تانڈور اربن راجندر ریڈی نے بتایا کہ اگر کسی کا موبائل فون چوری کرلیا گیا ہو یا گم ہوگیا ہو تو سی ای آئی آر پورٹل کی مدد سے فون دوبارہ واپس دلوانے کے اقدامات کیے جائیں گے۔انہوں نے کہا کہ متاثرہ افراد اپنے آدھار کارڈ اور آئی ایم ای آئی نمبر کے ساتھ می۔سیوا Me-Seva کے ذریعہ سی ای آئی آر پورٹل پر شکایت درج کروائیں۔اس کے بعد پولیس اس مسروقہ یا گمشدہ موبائل فون کا پتہ چلائے گی۔

دوسری جانب سی ای آئی آر CEIR#  ویپ پورٹل کے مطابق کسی بھی شخص کا موبائل فون چوری یا گم ہوجائے تو وہ فوری اس کی شکایت پولیس میں درج کروائیں۔بعدازاں اس ویب پورٹل کو کلک کرکےاپنے گمشدہ موبائل فون کا آئی ایم ای آئی IMEI نمبربلاک کروائیں۔ یا اپنے موبائل فون نیٹ ورک سے یا پھر پولیس سے شکایت کرکے بھی اپنے گمشدہ موبائل فون کا IMEI نمبر بلاک کرواسکتے ہیں۔

انٹرنیشنل موبائل ایکیوپمنٹ آئیڈنٹٹی ( آئی ایم ای آئی I M E I ) نمبر کیا ہوتا ہے۔؟

International Mobile Equipment Identity { IMEI }

تمام رجسٹرڈ موبائل فون سیٹ میں آئی ایم ای آئی نمبر پرمشتمل آلہ جو کہ انتہائی اہمیت کاحامل ہوتا ہے موجود ہوتا ہے، جو موبائل نیٹ ورک کے سم کارڈ کے ساتھ کام کرتا ہے۔آئی ایم ای آئی کی مدد سے صارف کی کسی جگہ موجودگی کے مقام کی نشاندہی ہوسکتی ہے۔اگر آئی ایم ای آئی کو بلاک کر دیا جائے تو موبائل فون ناکارہ ہوجاتا ہے۔

جب کوئی موبائل فون خریداجاتاہے تو باقاعدہ اس کےباکس پر دیگر تفصیلات کے ساتھ آئی ایم ای آئی نمبر IMEI No بھی لکھا ہوا ہوتاہے اور موبائل فون خریدی کی رسید پر 15 ہندسوں پر مشتمل آئی ایم ای آئی نمبر بھی لکھ کر دیا جاتاہے۔بناء آئی ایم ای آئی نمبر کے موبائل فونس کی فروخت قانونی طور پر جرم ہے۔کیونکہ ایسے موبائل فون مختلف ملک دشمن سرگرمیوں اور مجرمانہ سرگرمیوں میں استعمال کیے جانے کا پورا اندیشہ ہوتا ہے اور اس نمبر کے بغیر موبائل فون کا لوکیشن اور استعمال کنندہ کا پتہ نہیں لگایا جاسکتا۔!!

ہر موبائل صارف کے لیے یہ ضروری ہوتا ہے کہ وہ اپنے اور تمام افراد خاندان کےموبائل فونس کے آئی ای ایم آئی نمبرس لکھ کر محفوظ رکھ لیں۔اگر کسی وجہ سے آپ کی جانب سے خریدے گئے موبائل فون اور سم کارڈ کا آئی ایم ای آئی نمبر آپ کے پاس موجود نہیں ہے تو فکر کی کوئی ضرورت نہیں ہے۔

بلکہ اپنے موبائل فون پر #06#* ٹائپ کردیں تو فوری آپ کے موبائل فون کے اسکرین پر آئی ای ایم آئی IMEI نمبر نظر آجائے گا۔اس کا اسکرین شاٹ لے لیں اور اس کو کہیں لکھ کر محفوظ کرلیں۔فون چوری ہوجانے یا گم ہوجانے کی صورت میں آپ بھی اس CEIR# پورٹل کی مدد سے اپنا فون واپس حاصل کر سکتے ہیں۔

گمشدہ یا سرقہ شدہ فون کی شکایت،یا سم کارڈ بلاک کرنے کےلیے آپ محکمہ ٹیلی کمیونیکیشن کےاس ویب پورٹل کی لنک کو کلک کرکے تمام طریقہ کار اور تفصیلات سے واقفیت حاصل کرسکتے ہیں۔اور اس پر بتائے گئے طریقہ سے اپنی شکایت درج کروا سکتے ہیں۔یاد رہے کہ آپ کا موبائل کتنے ماہ قبل چوری یا گم ہوا ہے اس کی کوئی قید نہیں ہے۔!!

” سی ای آئی آر پورٹل کی لنک کو یہاں کلک کیا جاسکتا ہے۔ "

http://www.ceir.gov.in