تلنگانہ میں فرقہ وارانہ منافرت پھیلانے کی مذموم کوششیں قابل مذمت
مفادات حاصلہ امن وبھائی چارگی کی فضاء کو متاثر کرنے کے درپہ
مولانا حامدمحمدخان امیرحلقہ جماعت اسلامی ہند حلقہ تلنگانہ کا بیان
حیدرآباد:23۔اگست(سحرنیوزڈاٹ کام/پریس نوٹ)
مولانا حامدمحمدخان امیرحلقہ جماعت اسلامی ہند حلقہ تلنگانہ نے ریاست تلنگانہ کی پرامن فضاء کو متاثر کرنے اور فرقہ وارانہ منافرت پھیلانے کی کوششوں کی سخت مذمت کرتے ہوئے کہا ہے کہ امن اور بھائی چارگی کا ماحول نہ صرف پرامن وپرسکون زندگی کے لیے ضروری ہے بلکہ ملک کی تعمیر وترقی کے لیے بھی لازم ہے۔
صحافت کے لیے آج جاری کردہ اپنے بیان میں مولانا حامدمحمدخان امیرحلقہ جماعت اسلامی ہند حلقہ تلنگانہ نے کہاکہ بھگوا پارٹی کے رکن اسمبلی حلقہ گوشہ محل،حیدرآباد راجہ سنگھ اپنےزباں وبیاں سے ریاست کے بھائی چارہ اور فرقہ وارانہ ہم آہنگی کو متاثرکرنے کی ناکام کوششوں میں لگے ہوئے ہیں تاکہ تلنگانہ میں اقتدار کے خواب کی تکمیل ہوسکے۔
مولانا حامدمحمدخان نے کہا کہ جماعت اسلامی ہند اس طرح کی تمام کوششوں کی سخت مذمت کرتی ہے اور حکومت تلنگانہ سے مطالبہ کرتی ہے کہ وہ راجہ سنگھ کو محض گرفتارکرنے پر ہی اکتفا نہ کرے بلکہ ایسے مذموم شخص کوشہر بدر کیا جائے تاکہ ریاست میں امن وآشتی کاماحول برقرار رہے۔
امیر حلقہ تلنگانہ مولانا حامدمحمد خان نے ریاست کے تمام امن پسندعوام خصوصاً ملت اسلامیہ سے اپیل کی کہ وہ صبروتحمل کا مظاہرہ کریں اور ہرقسم کی اشتعال انگیزی سے پرہیز کریں۔
