ممبئی ایرپورٹ پر 32 کروڑ روپئے مالیتی 61 کلو سونا کے بسکٹ ضبط، سات گرفتار

ممبئی ایرپورٹ پر 32 کروڑ روپئے مالیتی 61 کلو سونا کے بسکٹ ضبط،سات گرفتار
ایک ہی دن میں اب تک کی سب سے بڑی ضبطی
اندرون ایک ماہ کروڑہا روپئے مالیتی کئی کلو سونا اور غیر ملکی کرنسی ضبط

ممبئی: 13۔نومبر
(سحرنیوزڈاٹ کام/سوشل میڈیا ڈیسک)

ملک کے مختلف ایرپورٹس پر ان دنوں بیرون ممالک سے آنے والے مسافرین کے قبضہ سے اسمگل کیے جانے والے کروڑہا روپئے مالیتی بڑی مقدار میں سونا ضبط کرنے کی خبریں عام ہوتی جارہی ہیں۔گزشتہ ماہ حیدرآباد ایرپورٹ پرکسٹم عہدیداروں نےکروڑوں روپئے مالیتی سوناضبط کیاہے۔

دو دن قبل 11 نومبر کو ہی حیدرآباد کے راجیو گاندھی انٹرنیشنل ایرپورٹ(شمس آباد ایرپورٹ) پر ایر انٹلی جنس یونٹAIU# اورمحکمہ کسٹمس کےعہدیداروں نے خفیہ ذرائع کی اطلاع کے بعد دبئی سے ایمریٹس کی فلائٹ نمبر EK-524 کےذریعہ حیدرآباد ایرپورٹ پہنچنے والےدو مسافروں کےقبضہ سے 5 کلو 228 گرام سوناضبط کیاتھا۔جس کی مالیت دو کروڑ 80 لاکھ روپئے بتائی گئی ہے۔محکمہ کسٹمس کے عہدیداروں کےمطابق یہ دونوں مسافر اس سونا کو پیسٹ کی شکل میں ڈھال کر اپنی انڈر ویئرز میں بنائی گئی خصوصی پیاکیٹس میں چھپاکر اسمگل کررہے تھے۔بعدازاں ان دونوں مسافروں کےخلاف سونا کی اسمگلنگ کا کیس درج رجسٹر کرتے ہوئے انہیں گرفتار کرلیا اور اس سلسلہ میں مزید تحقیقات جاری ہیں۔

وہیں ممبئی کے چھترپتی شیواجی مہاراج انٹرنیشنل ایرپورٹ پرمحکمہ کسٹمس کےعہدیداروں نے دو علحدہ علحدہ کاروائیوں میں 61 کلوسونا کے بسکٹ ضبط کرلیے۔جس کی مالیت 32 کروڑ روپئے بتائی گئی ہے۔اس کی اطلاع محکمہ کسٹمس کی جانب سے آج 13 نومبر کی سہء پہر اس کے ٹوئٹرہینڈل کے ذریعہ دی گئی ہے۔بتایا جارہا ہے کہ یہ واقعہ 9 نومبر کو ہے۔

اس سلسلہ میں کسٹم عہدیداروں نے تین ہندوستانیوں کو حراست میں لیاہے جنہیں سونا کی منتقلی کے لیے استعمال کیا جارہا تھا۔حراست میں لیے گئے ان تینوں مسافروں کے قبضہ سے 53 کلو سونا ضبط کیا گیا۔عہدیداروں کےمطابق ان سونے کےبسکٹوں کو کمر کےبیلٹ میں چھپاکر لایا گیا تھا۔ان تینوں کے ہر ایک اپنی بیلٹ سے تقریباً 18 کلو سونا برآمد کرلیا گیا۔

محکمہ کسٹمس کے عہدیداروں نےسوڈانی شہریوں کو بھی حراست میں لیاہے جو ان ہندوستانیوں کے ساتھ سفر کررہے تھے اور شبہ ہے کہ وہ اسمگلنگ ریکٹ کے ماسٹر مائنڈ ہیں۔ذرائع کےمطابق خیال کیاجاتا ہے کہ سوڈانی شہری اسمگل شدہ سونے کے کاروبار کے لیے ہندوستان/ممبئی اپنا ایک نیٹ ورک بنائے ہوئے ہیں۔

ایک اور کارروائی میں ممبئی ایر انٹلی جنس یونٹ اور محکمہ کسٹمس کے عہدیداروں نے 8 کلو سونا برآمد کیا اور اسےمنتقل کرنےوالے دو افراد سے پوچھ تاچھ میں مصروف ہیں۔عہدیداروں نےتفصیل بتانے سے انکار کرتے ہوئے کہا کہ قبضہ سے متعلق کارروائیاں جاری ہیں۔اس سلسلہ میں ممبئی ایر انٹلی جنس یونٹ AIU#کسٹمس کےعہدیداروں کا کہنا ہے کہ ممبئی ایرپورٹ پر ایک ہی دن میں اتنی بڑی مقدار میں سونا کی ضبطی اب تک کا پہلا واقعہ ہے۔

وہیں ممبئی ایرپورٹ پر محکمہ کسٹمس کے عہدیداروں نے 10 نومبر کو بھی 3 کلو 700 گرام 24 قیراط کاحامل سونا ضبط کیا تھا۔جسے پاؤڈر کی شکل میں اسمگل کیا جارہا تھا۔اس معاملہ میں میڈیارپورٹس کےمطابق ایر انٹلی جنس یونٹ نے دو افراد ذیشان چندرکی اور سعدیہ ملا کو 3 کلو 700 گرام سونا کی پنچنامہ کے بعد ضبطی عمل میں لاتے ہوئے گرفتار کیاہے۔

ایر انٹلی جنس یونٹ کے ذرائع نے بتایا کہ ان دونوں نے قبول کیاہےکہ سونا کا پاؤڈر انہیں سعودی عرب کے جدہ کی ایک ہوٹل میں ایک ضمیر نامی شخص نے دیا تھا۔اور انہیں کہا گیا تھا کہ وہ اس سونا کو اس شخص تک پہنچا دیں جو ممبئی پہنچنےکےبعد ان سےرابطہ قائم کرے گا۔دونوں ملزمان کو 23 نومبر تک عدالتی تحویل میں بھیج دیا گیا ہے۔

یادرہے کہ ممبئی کے چھترپتی شیواجی مہاراج انٹرنیشنل ایرپورٹ پر ماہ اکتوبر کے وسط میں دو دنوں کےدؤران علحدہ علحدہ کارروائیوں میں مختلف ممالک سے آنے والے 8 مسافرین کے قبضہ سے اسمگل کیا جانے والا 31 کلو سے زائد سونا ضبط کرلیاتھا۔جس کی مالیت 16 کروڑ روپیوں سے زائد بتائی گئی تھی۔وہیں ممبئی ایرپورٹ سے دبئی جانے والے دو مسافرین کے قبضہ سے 95,000 درہم بھی ضبط کرلیے گئے تھے جن کی مالیت ہندوستانیوں روپیوں میں 22 لاکھ روپئے بتائی گئی تھی۔

ایک اور کارروائی میں محکمہ کسٹمس نے 11 اکتوبر کو دبئی سے ایمریٹس Emirates# کی فلائٹ نمبر EK 500 کے ذریعہ ممبئی ایرپورٹ پہنچنے والے ایک مسافر کےقبضہ سے 9 کلو 895 گرام سونا کے بسکٹ ضبط کرلیے تھے۔جس کی مالیت 5 کروڑ 20 لاکھ روپئے بتائی گئی تھی۔محکمہ کسٹمس کے عہدیداروں کے مطابق دبئی ایرپورٹ پر دو سوڈانی مسافروں نے یہ سونا اس ہندوستانی مسافر کے حوالے کیا تھا جوکہ اس کے ساتھ سفر کرتے ہوئےممبئی ایرپورٹ پہنچے تھے۔اس معاملہ میں بشمول ہندوستانی دونوں سوڈانی مسافروں کو بھی گرفتار کرلیا گیاتھا۔یہ سونا اسمگلنگ کی غرض سے خصوصی طور پر تیار کردہ سینے کے بیلٹ میں چھپاکر لایا گیا تھا۔

جبکہ جاریہ ماہ 3 نومبر کو ممبئی کےچھترپتی شیواجی مہاراج انٹرنیشنل ایرپورٹ پر ممبئی ایر انٹلی جنس یونٹ AIU#کسٹمس کےعہدیداروں نےایک ہی خاندان کے تین افراد کے قبضہ سے چار لاکھ 97 ہزار امریکی ڈالرز ضبط کرلیےتھے۔جن کی مالیت چار کروڑ ایک لاکھ روپئے بتائی گئی تھی۔بعدازاں ان تینوں کو گرفتار کرلیا گیاتھا۔محکمہ کسٹمس کے عہدیداروں کےمطابق یہ تین رکنی خاندان ممبئی سے دبئی پرواز کرنے والا تھا۔اس ہندوستانی خاندان کے تینوں مسافرین کے سامان کی تلاشی لی گئی تو کپڑوں اور جوتوں میں چھپاکریہ امریکی ڈالرز دبئی اسمگل کیے جارہے تھے۔کسٹمس عہدیداروں کےمطابق بعدازاں گرفتار شدگان کو عدالتی تحویل میں روانہ کردیا گیا۔

” یہ بھی پڑھیں "

حیدرآباد ایرپورٹ پر دُبئی سے آنے والے دو مسافروں کے قبضہ سے دو کروڑ 80 لاکھ روپئے مالیتی 5 کلو سے زائد سونا ضبط، دونوں گرفتار

ممبئی ایرپورٹ پر چار کروڑ روپئے مالیتی ڈالرضبط، تین گرفتار، دہلی ایرپورٹ پر 30 کروڑ روپئے مالیتی منشیات ضبط، نائجیرین خاتون گرفتار

ممبئی ایرپورٹ پر محکمہ کسٹم کے عہدیداروں نے 8 مسافرین کے قبضہ سے 16 کروڑ روپئے مالیتی 31 کلوسونا ضبط کرلیا، دو مسافروں کے قبضہ سے 95 ہزار درہم بھی ضبط