تلنگانہ میں کوویڈ پروٹوکال کے ساتھ عبادت گاہوں کی کشادگی عمل میں لائی جائے
امیر جماعت اسلامی ہند مولانا حامدمحمد خان کا حکومت سے مطالبہ
حیدرآباد :17۔جون(سحرنیوزڈاٹ کام)
امیرحلقہ جماعت اسلامی ہند حلقہ تلنگانہ مولاناحامدمحمدخان نے اپنےصحافتی بیان میں حکومت تلنگانہ سے مطالبہ کیا ہے کہ ریاست میں فوری طور پر مساجد کی کشادگی عمل میں لانے کے احکام جاری کیے جائیں۔
انہوں نے کہا کہ کوویڈ کے بڑھتے ہوئے معاملات کے پیش نظرحکومت نے محکمہ صحت کی سفارشات کی بنیاد پرابتداء میں4 گھنٹے صبح (6تا10بجے) دن نرمی کے ساتھ لاک ڈاؤن نافذ کیاتھا۔
بعدازاں اسے ایک بجے تک بڑھایا گیا اور اب صبح 6بجے تا شام 6بجے لاک ڈاؤن کے اوقات میں نرمی دی گئی ہے اور شام 6بجے تاصبح 6بجے تک لاک ڈاؤن جاری ہے۔
امیرحلقہ جماعت اسلامی ہند حلقہ تلنگانہ مولاناحامدمحمدخان نے کہا کہ اب جبکہ صبح 6 تا شام 6بجے لاک ڈاؤن میں نرمی کے اوقات میں تقریباً تمام ہی تجارتی ادارے،دفاتر، حتیٰ کہ شراب خانے بھی کھلے رکھنے کی اجازت ہے لیکن مساجدمیں مصلیوں کی محدود تعدادمیں داخلہ کی اجازت دی گئی ہے۔
موجودہ حالات میں کوویڈ قواعد کے تحت ماسک،سینی ٹائزر اور طبعی دوری پرعمل کے ساتھ مساجد میں نمازوں کی ادائیگی کی اجازت فوری طور پر دی جائے۔
ساتھ ہی امیرحلقہ جماعت اسلامی ہند حلقہ تلنگانہ مولاناحامدمحمدخان نے عوام الناس سے بھی اپیل کی ہے کہ وہ کوویڈ سے تحفظ کیلئے کوویڈ قواعد کی پابندی کریں۔
