اتراکھنڈ : ہلدوانی میں چار ہزار سے زائد مکانات، مساجد، منادر،اسکولز، ہسپتالوں کے انہدام کے ہائی کورٹ کے حکم پر کل سپریم کورٹ میں سماعت

اتراکھنڈ کے ہلدوانی میں چار ہزار سے زائد مکانات،مساجد،منادر،اسکولوں اور ہسپتالوں کے انہدام
کے ہائی کورٹ کے حکم پر کل 5 جنوری کو سپریم کورٹ میں سماعت، مکین شدید پریشان

نئی دہلی/ہلدوانی: 04۔جنوری
(سحرنیوز ڈاٹ کام/ایجنسیز)

اتر اکھنڈا ہائی کورٹ کی جانب سے ہلدوانی میں موجود 29 ایکڑ (ایک اور اطلاع میں 78 ایکڑ) ریلوے کی اراضی کوخالی/منہدم کروانے کے فیصلہ کے خلاف سپریم کورٹ میں درخواستیں داخل کی گئی ہیں۔جن کی سماعت کل 5 جنوری کوہوگی۔سماجی جہد کار و نامور وکیل پرشانت بھوشن کی جانب سےسپریم کورٹ میں باضابطہ ذکر کرنےکے بعد معزز چیف جسٹس ڈی وائی چندرچوڑ،جسٹس ایس اے نذیر اور پی ایس نرسمہا پرمشتمل بنچ نے کہا کہ اس معاملہ کی سماعت کل 5 جنوری، بروز جمعرات کو ہوگی۔

BREAKING: Eviction of 5,000 people from their homes in Haldwani '(Uttarakhand) mentioned in Supreme Court

Adv Prashant Bhushan: This petition is listed tomorrow. If our plea can be tagged with it

CJI DY Chandrachud: Yes it will come up tomorrow#SupremeCourt #Haldwani pic.twitter.com/XbJCJWztbx

— Bar and Bench (@barandbench) January 4, 2023

ریاستی ہائی کورٹ کےاس حکم کےبعد ملک کے دارلحکومت دہلی سے 296 کلومیٹر اور ہمالیائی ریاست اتر اکھنڈ کےدارالحکومت دہرہ دون سے274 کلومیٹر کےفاصلہ پرموجود ہلدوانی کے ریلوے اسٹیشن کے قریب بن بھول پورہ علاقہ کی غفور بستی،ڈھولک بستی اور اندرا نگر کی ان بستیوں میں بے بسی، لاچاری اور خوف نے گھر کرلیاہے۔یہاں کے مکین موم بتی ریالیوں اور دعائیہ اجتماعات،احتجاج کے ذریعہ ریاستی اور مرکزی حکومت سے مداخلت کرنے کی اپیل کررہے ہیں۔

ان کا کہنا ہے کہ وہ اس اراضی پر 30 سال سےزائدعرصہ سے رہتے اور بستے آئے ہیں ان میں سے کئی خاندان بتاتے ہیں کہ وہ 70 سال سے اس مقام پرمقیم ہیں اور ان کے پاس اراضیات کے باقاعدہ دستاویزات موجود ہیں،بلدیہ اور برقی کے بلس بھی وہ ادا کرتے آئے ہیں،مکانات کے علاوہ،یہاں تک کہ اس علاقے میں چار سرکاری اسکول،11 خانگی اسکول،ایک بینک،دو اوور ہیڈ واٹر ٹینک،10 مساجد،چار مندر، دکانات کئی دہائیوں قبل تعمیر کی گئی ہیں۔

طویل مقدمہ بازی کے بعد 20 دسمبر کو اتراکھنڈ ہائی کورٹ نے ہلدوانی کی ان بستیوں کو ریلوے کی اراضی پر قبضہ قرار دیتے ہوئے وہاں موجود تعمیرات کو منہدم کرنے کا حکم دیا تھا۔جسٹس شرد شرما اور آر سی کھلبے کی ڈویژن بنچ نے ہدایت دی تھی کہ آباد کاروں کو ایک ہفتہ کا نوٹس دیا جائے اس کے بعد ان تعمیرات کومنہدم کردیا جائے۔
عدالتی حکم پرعمل کرتے ہوئےضلعی انتظامیہ نے اخبارات میں ایک نوٹس جاری کی جس میں ان مقامات کےمکینوں سے کہا گیا کہ وہ 9 جنوری تک اپنا سامان لے جائیں اور علاقے خالی کردیں۔

ہائی کورٹ کے اس حکم کےبعد ہلدوانی میں سرکاری انتظامیہ کی جانب سے کی جانےوالی اس انہدامی کارروائی کی زد میں 4,365 عمارتیں آئیں گی جن میں مکانات،دکانات،مساجد،درگاہیں،منادر،سرکاری اسکول اور کالجوں کی عمارتوں کے ساتھ ساتھ سرکاری ہسپتال بھی شامل ہیں۔اطلاعات کے مطابق اس انہدامی کارروائی سے 50,000 سے زائد افراد بے گھر ہوجائیں گے۔

یاد رہے کہ ہلدوانی کے ان مسلم خاندانوں کے خلاف 2016ء میں ایک درخواست مفاد عامہ کےتحت روی شنکر جوشی نے دائر کی تھی۔جن کا تعلق آر ایس ایس سے بتایا گیا ہے۔!! یہاں کے مکینوں کا الزام ہے کہ محض انہیں مسلمان ہونے کی وجہ سے بے گھر کیا جانے والا ہے۔! جبکہ اس علاقہ میں غیرمسلم برادری بھی آباد ہے،لیکن ان کی تعدادبہت کم ہے۔ان علاقوں کےمکینوں کاسوال ہےکہ جب یہ بستیاں ناجائز تھیں تو کیوں پردھان منتری آواس یوجنا کے تحت مکانات کی تعمیر کے لیے مالی مدد کی گئی،کیوں حکومت نے اس علاقہ میں ہسپتال،اسکول اور کالج تعمیر کروائے اور کیوں ان سے اتنے سال تک مختلف ٹیکس وصول کیے گئے۔؟مکینوں کا کہنا ہے کہ ان کے پاس باقاعدہ آدھار کارڈ،ووٹر کارڈز بھی موجود ہیں۔

اطلاعات کے مطابق ان بستیوں کو منہدم کرنے کے لیے بلڈوزرس،7,000 پولیس ملازمین اور 15 نیم فوجی پلاٹونس کی خدمات حاصل کی جانے والی ہیں۔اور اس انہدامی کارروائی پر 23 کروڑ روپے خرچ ہوں گے۔

اتر اکھنڈ ہائی کورٹ کےحکم کےبعد اب سپریم کورٹ پر ان علاقوں کے خوفزدہ مکینوں کےعلاوہ سب کی نظریں لگی ہوئی ہیں۔مکینوں کویقین ہے کہ انہیں سپریم کورٹ سے انصاف اور راحت نصیب ہوں گے۔جہاں کل 5 جنوری کو اس معاملہ کی سماعت ہوگی۔

وہیں کانگریس کےسینئر لیڈر و سابق وزیراعلیٰ اتراکھنڈ ہریش راوت نے ریاستی دارالحکومت دہرادون میں اپنےگھر پر ایک گھنٹہ طویل مون ورت (خاموشی )احتجاج کیا۔انہوں نے کہاکہ اتراکھنڈ ایک روحانی ریاست ہے اگر 50,000 افراد بشمول بچے، حاملہ خواتین، بوڑھے اورعورتیں اپنے مکانات خالی کرکے سڑکوں پر نکل جانے کے لیے مجبورکیے جائیں،تو یہ انتہائی افسوسناک منظر ہوگا۔

صدر جن ادھیکار پارٹی و سابق رکن پارلیمان پپو یادو نے آج اپنے مصدقہ ہینڈل سےکیے گئے اپنے ایک ٹوئٹ میں لکھا ہے کہ”اتراکھنڈ کے نینی تال ضلع میں ہلدوانی واحد ایسا اسمبلی حلقہ ہے،جہاں بی جے پی جیت نہیں پارہی ہے۔اب ہلدوانی میں 5,000مکانات پر بلڈوز چلایاجائے گا۔”

دوسری جانب ہلدوانی کے اس مسئلہ کو لےکرجہاں 50,000 سے زائد مکین آنسو بہانے پر مجبور ہیں اور روتے بلکتے مرکزی حکومت سے مداخلت کی اپیل کررہے ہیں وہیں سوشل میڈیا پر ہمیشہ کی طرح ایک گروپ جشن منانے میں مصروف ہے۔باقاعدہ انہدام کی تائید پرمشتمل ہیش ٹیگ چلایاجارہا ہے اور اس پر برقعہ پوش خواتین،داڑھی کرتاوالے مردوں کی میمز اور تصاویرپھیلائی جارہی ہیں جن میں وقف اراضیات کاذکربھی ہے۔

📌Ground Report from #Haldwani
Locals claim the HC’s move is politically motivated and is being done to reduce Muslim vote bank in the state. They say won't leave their homes even if they die, all hopes on the SC.
Full report for @TheClarionIndia 👇https://t.co/76ZhvHICg0 pic.twitter.com/DA5biE89j4

— Ghazala Ahmad (@ghazalaahmad5) January 4, 2023