ای ڈی اور سی بی آئی نے تمام بدعنوان لوگوں کو ایک ہی پارٹی میں جمع کردیا : اروندکیجریوال

ای ڈی اور سی بی آئی نے تمام بدعنوان لوگوں کو ایک ہی پارٹی میں جمع کر دیا
بی جے پی دؤر میں ہر کوئی خوفزدہ ، اقتدار ہمیشہ نہیں رہتا : اروند کیجریوال
ممتا بنر جی نے بی جے پی واشنگ مشین کے ذریعہ بی جے پی کا مذاق اڑایا

نئی دہلی : 30۔مارچ
(سحرنیوزڈاٹ کام/سوشل میڈیا ڈیسک)

دہلی کے چیف منسٹر اروند کیجریوال چند دنوں سے وزیراعظم نریندرمودی اوربھارتیہ جنتا پارٹی پر تلخ ریمارک اور طنز کے تیر برسانے میں مصروف ہیں۔دہلی اسمبلی کےجاریہ اجلاس میں وہ کھل کر بی جے پی اور وزیراعظم کو اپنی شدیدتنقید کانشانہ بنارہے ہیں اورمسکراتے ہوئے بی جے پی اور وزیراعظم پر ریمارک بھی کر رہے ہیں۔ان کے ویڈیوز سوشل میڈیا پر وائرل بھی ہو رہے ہیں۔

چیف منسٹر دہلی اروند کیجریوال نے کل الزام عائد کیا کہ ای ڈی اورسی بی آئی کے چھاپوں نے تمام بدعنوان لوگوں کو "ایک ہی سیاسی پارٹی” میں جمع کر دیا ہے اور جب مرکز میں بی جے پی کی حکومت ختم ہوگی تو ملک بدعنوانی سے پاک ہوجائے گا۔

ایک دن قبل وزیراعظم نریندر مودی کے اس ریمارکس کا حوالہ دیتے ہوئے کہ ای ڈی اور سی بی آئی نے تمام بدعنوان لوگوں کو ایک پلیٹ فارم پر لایا ہے،کیجریوال نے بھارتیہ جنتا پارٹی (بی جے پی) پر طنز کرتےہوئے کہاکہ ” ای ڈی اور سی بی آئی نے سب کو ایک پلیٹ فارم پر لایا ہے۔کرپٹ لوگ ایک پلیٹ فارم پر نہیں بلکہ ایک ہی پارٹی میں اکٹھے ہوگئے ہیں۔

دو قدم آگے بڑھ کر اروند کیجریوال نے سخت ریمارک کیاکہ ملک کے جتنے لچے،لٹیرے،ڈاکو اور چور تھے اب وہ تمام ایک ہی پارٹی میں ہیں۔انہوں نے کہاکہ وقت ہمیشہ ایک جیسا نہیں رہتا بدلتا رہتا ہے،آج مودی جی وزیراعظم ہیں ہمیشہ تو نہیں رہیں گے، کبھی نہ کبھی تو جائیں گے ہی،اس وقت کرپشن سے پاک ہندوستان ہوگا۔کیونکہ جتنے چور اُچکے ہیں سارے ایک ہی کمرے میں ہیں ان کوپکڑنے میں آسانی ہوگی۔زیادہ جانچ نہیں کرنی پڑے گی۔

https://www.facebook.com/khanyahiya276/videos/242083948238172

اروند کیجریوال نے الزام عائد کیاکہ سارے ملک کےلٹیروں کو ای ڈی اور سی بی آئی دکھاکر اپنی پارٹی میں اکٹھا کرلیا۔جس دن ان کی حکومت جائے گی مودی جی وزیراعظم نہیں رہیں گے اس دن بی جے پی والوں کو جیل میں ڈال دیں اس دن ملک بدعنوانیوں سے پاک ہوجائے۔

چیف منسٹر دہلی اروند کیجریوال نے اسمبلی میں اپنے خطاب میں الزام عائد کیا کہ میڈیا کو ڈرا کر رکھا ہے۔اس لیے میڈیا کی اپنی مجبوری ہے جو غلط خبریں دکھارہے ہیں انہوں نے یہ الزام بھی عائد کیا کہ ایک ایک میڈیا کے مالک پر چار،چار ای ڈی کےکیس بناکر رکھے ہیں۔ اس لیے یہ مجبوری ہے ان کی جگہ کوئی اور ہوتا تو وہ بھی یہی کرتا۔اروند کیجریوال نے یہ الزام بھی عائد کیاکہ بی جے پی نے ججوں کو تک ڈرا کررکھا ہے۔ملک کےسارے ججس ڈرے ہوئے ہیں،سپریم کورٹ،ہائی کورٹس، ڈسٹرکٹ کورٹس کے ججس ڈرے ہوئے ہیں۔انہوں نے الزام عائد کیا صحافی ڈرے ہوئے ہیں،صنعت کار ڈرے ہوئے ہیں۔

انہوں نے الزام عائد کیا کہ اپوزیشن والی ریاستی حکومتوں کو کام کرنے نہیں دیا جارہا ہے عام آدمی پارٹی والی پنجاب حکومت کو بجٹ سیشن منعقد کرنے کی وہاں کے گورنر نے اجازت نہیں دی،سپریم کورٹ کی ہدایت پر ہی بجٹ سیشن منعقد ہوا۔انہوں نےریاست تلنگانہ کاحوالہ دیتے ہوئے کہا کہ حکومت تلنگانہ بھی سپریم کورٹ گئی ہوئی ہے بتایا جاتا ہے ریاستی گورنر نے 6 ماہ سے 12 بلوں پر دستخط نہیں کیے ہیں۔

اسمبلی میں ان کےذریعہ پیش کردہ اعتماد کی تحریک پر بات کرتےہوئے چیف منسٹرنے الزام عائد کیاکہ بی جے پی نے اپنی عدم اعتماد کی تحریک کو واپس لے لیا جب وہ عام آدمی پارٹی کے ایم ایل ایز کو پکڑنے میں ناکام رہی، انہوںنے کہا کہ عام آدمی پارٹی کبھی بھی کسی دباؤ کے سامنے نہیں جھکے گی۔یہ الزام عائدکرتےہوئےکہ بی جے پی صرف لڑنا اور گالی دینا جانتی ہے،اروند کیجریوال نے دعویٰ کیاکہ 2025 کےاسمبلی انتخابات کو چھوڑ دیں، زعفرانی پارٹی 2050 میں بھی دہلی میں الیکشن نہیں جیت پائے گی۔

بی جے پی کی جانب سے مرکزی ایجنسیوں ای ڈی،سی بی آئی کے استعمال کا الزام عائد کرتے ہوئے اروند کیجریوال نے کہا کہ بھگوا پارٹی ملک میں جمہوریت کو پامال کرنے کا کوئی موقع ضائع کرنے میں ناکام نہیں رہی ہے۔انہوں نے مزید الزام عائد کیاکہ عام آدمی پارٹی کے ایم ایل ایز کو سی بی آئی اور ای ڈی کے چھاپوں کی دھمکی دی گئی ہے اور ہر ایک کو 25 کروڑ روپے کی رشوت کی پیشکش کی گئی ہے،انہوں نے کہا کہ لیکن کوئی بھی پارٹی کو توڑ نہیں سکا۔اپنے ایم ایل ایز کو مخاطب کرتے ہوئے چیف منسٹر نے کہا کہ آپ میں سے ہر ایک، ایک جوہر ہے۔ ڈرو مت،یہاں تک کہ اگر آپ جیل بھی جاتے ہیں،میں آپ کے خاندانوں کا خیال رکھوں گا۔

چیف منسٹر دہلی اروند کیجریوال نے کہا کہ سارے چور اور کرپٹ لوگ ایک پارٹی میں ہیں۔ایک بار جب بی جے پی کےلوگ جیل میں ہوں گے تو ان کی حکومت ختم ہو جائے گی، ملک بدعنوانی سے پاک ہو جائے گا۔انہوں نے کہا کہ وزیراعظم کے پاس ملک کو آگے لے جانے کا بہت بڑا موقع تھا لیکن قوم میں خوف اور لوٹ مار کا ماحول پیدا کردیا گیا ہے۔