ضلع وقارآباد میں کورونا وائرس کے بڑھتے ہوئے معاملات،ضلع انتظامیہ اورعوام میں تشویش کی لہر
جملہ کوویڈ متاثرین کی تعداد 3,815 تک پہنچ گئی، 3,543صحتیاب، 61 کی موت،227 متاثرین قورنطین میں
تانڈور۔ 25۔مارچ (سحرنیوزڈاٹ کام)
ضلع وقارآباد میں کوویڈ متاثرین کی تعدادمیں اضافہ کاسلسلہ جاری ہے جس سے ضلع انتظامیہ،پولیس اور عوام میں تشویش کی لہر پیدا ہوگئی ہے۔16؍مارچ سے آج 25؍مارچ تک ضلع وقارآباد کے چار اسمبلی حلقہ جات وقارآباد ، تانڈور ، پرگی اور کوڑنگل میں جملہ 190؍افراد کوویڈ سے متاثر ہوئے ہیں۔
کل 24؍مارچ کو ضلع میں 23؍افراد کوویڈسے متاثر ہوئے تھے جن میں سے 6؍کا تعلق وقارآبادسے، تانڈور اور یالال میں تین ، تین ،پدیمول ، کوڑنگل اور مرپلی میں دو، دو، نواب پیٹ ، پوڈور، دھاروراورپرگی میں ایک ایک فرد کوویڈ سے متاثر ہوا تھا۔
جبکہ آج 25؍مارچ کو ضلع وقارآباد میں مزید 21؍افراد کوویڈ سے متاثر ہوئے ہیں جن میں 6؍افراد کا تعلق تانڈور سے ہے جبکہ وقارآباد میں تین ، نواب پیٹ اور مومن پیٹ میں دو، دو، پرگی ، دوما،کلک چیرلہ ، پدیمول ، یالال ، بشیر آباد ، بھمرس پیٹ اور کوٹ پلی سے ایک ایک فرد کوویڈ سے متاثر پایا گیا ہے۔
محکمہ صحت و طبابت ضلع وقارآباد کی جانب سے آج 25؍مارچ کو جاری کردہ میڈیکل بلیٹن کے مطابق آج تک ضلع وقارآباد کے اسمبلی حلقہ جات وقارآباد، تانڈور، کوڑنگل اور پرگی کے ٹاؤنس اور 18؍منڈلات میں کورونا وائرس سے متاثر ہونے والے افرادکی جملہ تعداد 3,815 ؍تک پہنچ گئی ہے جن میں سے 3,543 ؍ متاثرین صحت یاب ہوچکے ہیں۔
آج تک ضلع کے مختلف مقامات میں 61؍ کورونا وائر س متاثرین کی موت واقع ہوئی ہے۔ اس رپورٹ کے مطابق ضلع وقارآباد میں آج تک جملہ 1,35,025؍افراد کے نمونے جانچ کی غرض سے حاصل کیے گئے تھے ان میں وہ 1,084؍افراد بھی شامل ہیں جن کے نمونے آج حاصل کیے گئے ہیں ان میں سے 1,30,072 ؍افراد کی رپورٹ منفی آئی ہے ان میں وہ 1,063؍ وہ افراد بھی شامل ہیں جن کی منفی رپورٹ آج آئی ہے۔
اس میڈیکل بلیٹن کے مطابق 4؍ ایکٹیو کورونا وائرس متاثرین کیساتھ207؍کورونا وائرس متاثرین کوہوم قورنطین میں رکھاگیا ہے ۔ان میں وہ 21؍متاثرین بھی شامل ہیں جن کی منفی مثبت رپورٹ آج آئی ہے۔ضلع میں دوبارہ کوویڈ معاملات میں اضافہ کے باعث انتظامیہ اورعوام میں تشویش پیدا ہوگئی ہے۔
کلکٹر ضلع وقارآباد پوسومی باسو،سرکل انسپکٹر پولیس تانڈور (اربن) روی کمار اور طبی ماہرین عوام کو صلاح دے رہے ہیں کہ وہ کوویڈ سے تحفظ کیلئے تمام احتیاطی اقدامات کریں جن میں ماسک کا استعمال ،سماجی فاصلہ قائم رکھنا اور سینی ٹائزر کا استعمال شامل ہے۔
