تانڈور میں بجلی گرنے سے درخت کے نیچے کھڑاشخص ہلاک، ایک لڑکا زخمی، تیسرا محفوظ، یالال منڈل میں بجلی گرنے سے پانچ بکریاں ہلاک

تانڈور میں بجلی گرنے سے درخت کے نیچے کھڑاشخص ہلاک، ایک لڑکا زخمی، تیسرا محفوظ
یالال منڈل میں بھی بجلی گرنے سے پانچ بکریاں ہلاک، عوام میں خوف و سراسمیگی کی لہر

وقارآباد/تانڈور: 20۔مئی
(سحر نیوز ڈاٹ کام)

وقارآبادضلع کے تانڈور ٹاؤن میں آج شام شدید گرج و چمک کےساتھ ہلکی اور تیز بارش ہوئی۔اسی دؤران قدیم تانڈور کے علاقہ میں ایک درخت پر بجلی گرنے کےباعث بارش سے پناہ لینے کی غرض سے اس درخت کے نیچے کھڑےہوئے ایک شخص کی جائےمقام پر ہی موت واقع ہوگئی جبکہ اسی درخت کے نیچے کھڑا ایک لڑکا اس بجلی کی زد میں آکر جھلس ہوگیا اور ایک مزید شخص اس واقعہ میں محفوظ رہا۔

آج شام وقارآباد ضلع کے قدیم تانڈور کے علاقہ میں پیش آئے اس افسوسناک واقعہ کی تفصیلات مقامی افراد اور متوفی کے افراد خاندان کے مطابق قدیم تانڈور کا ساکن پوری شیکھر 40 سالہ کرانہ شاپ چلاتا تھا۔جسے دو لڑکے بھرت اور شیواجی ہیں۔

پوری شیکھر آج شام اپنے مکان سے روانہ ہواتھا کہ اسی دوران گرج و چمک کے ساتھ بارش کا آغاز ہوا۔بارش سے بچنے کی غرض سےشیکھر قریب ہی موجود ایک درخت کے نیچے کھڑا ہوگیا۔اسی علاقہ میں چند لڑکے کرکٹ کھیل رہے تھے کہ ان میں سے ایک لڑکا ہنمنتو 17 سالہ بھی بارش سے بچنے کی غرض سے اسی درخت کے نیچے جاکر کھڑا ہوگیاتھا کہ اس درخت پر اچانک بجلی گرپڑی جس کے باعث پوری شیکھر کی وہیں موت واقع ہوگئی۔جبکہ ہنمنتو بجلی کی زد میں آکر جھلس گیا اسی درخت کے نیچے موجود ایک اور شخص اس بجلی کی زد میں آنے سے محفوظ رہا۔

اس واقعہ کی اطلاع کے فوری بعد پوری شیکھر کے افراد خاندان جائے مقام پر پہنچ گئے اور پوری شیکھر کو تانڈور کے گورنمنٹ ضلع ہسپتال منتقل کیا جہاں بعد معائنہ ڈاکٹرز نے اسے مردہ قرار دیا۔

وہیں بجلی کی زد میں آنے والے لڑکے ہنمنتو کوبھی سرکاری ہسپتال منتقل کیاگیا۔جس کے افراد خاندان نےاس کی حالت تشویشناک بتائی ہے۔

اسی دوران آج شام دیرگئے یالال منڈل میں بھی بجلی گرنے سے پانچ بکریاں ہلاک ہوگئی ہیں۔موضع حاجی پور کا ساکن موگلپہ بکریوں کی پرورش اور انہیں فروخت کرکے اپنے ذریعہ معاش حاصل کرتا ہے۔روزآنہ  کی طرح وہ آج اپنی بکریوں کو چرانے کی غرض سے جنگل میں لے گیا تھا کہ اچانک بکریوں پر بجلی گر پڑی جس کےباعث پانچ بکریاں ہلاک ہوگئیں۔اطلاع پر مویشیوں کےڈاکٹر سری کر ریڈی نے جائے مقام پر پہنچ کر مردہ بکریوں کا مشاہدہ کیا۔بکریوں کے مالک موگلپہ نے حکومت سے مناسب امداد کی اپیل کی ہے۔

یاد رہے کہ کل 19 مئی کو ہی حلقہ اسمبلی تانڈور کے یالال منڈل کے موضع بینور میں کسان انومپا (68 سالہ) اپنی بیوی ایلماں کےساتھ کپاس کے کھیت میں کام کررہا تھا کہ بعد دوپہر گرج و چمک کے ساتھ بارش کا آغاز ہوا۔اسی دؤران کسان انومپا پر بجلی گرپڑی جس کےباعث جائے مقام پر ہی وہ ہلاک ہوگیا۔جبکہ اس کی بیوی تھوڑے فاصلہ پر کھیت کےکاموں میں مصروف تھی وہ اس بجلی کی زد میں آنے سے محفوظ رہی تھی۔

کل ہی اس حادثہ کے نصف گھنٹے بعد ہی یالال منڈل کے ہی جنٹ پلی کےساکن کسان کے۔لکشمیا(28 سالہ) اپنے کھیت میں کرایہ کی مشین سے دھان کی فصل کی کٹوائی میں مصروف تھا اس کے ساتھ اس کے پڑوسی کھیت کا مالک منگلی سرینواس(35 سالہ) بھی موجود تھا جسے اپنی دھان کی فصل بھی کٹوانی تھی ان کے علاوہ کھیت میں دیگر مزدور بھی کام کر رہے تھے کہ اچانک بعد دوپہر ہی ان دونوں پر بھی بجلی گر پڑی تھی۔جس کے باعث ان دونوں کی موت واقع ہوگئی تھی۔

کل اور آج دو دنوں میں حلقہ اسمبلی تانڈور کے یالال منڈل میں بجلی گرنے سے تین کسانوں کی موت اور آج تانڈور کے بلدی حلقہ قدیم تانڈور کے علاقہ میں ایک شخص کی موت سے عوام میں سراسمیگی کی لہر دؤڑ گئی ہے۔

ماہرین ہمیشہ مشورہ دیتےہیں کہ بجلیوں کی گھن گرج اور گرج چمک کےساتھ ہونے والی بارش کے دوران کھلے مقامات اور درختوں کےنیچے ہرگز پناہ نہ لی  جائے۔ بلکہ بارش کی پرواہ نہ کرتے ہوئے کسی بھی طرح آبادی والے مقامات یا بند مقامات تک پہنچیں یا پھراپنے گھروں میں موجود رہیں۔

” یہ بھی پڑھیں "

وقارآباد ضلع : تانڈور کے یالال منڈل کے دو مقامات پر بجلی گرنے سے تین افراد ہلاک