رشی سوناک اپنے عہدہ کا جائزہ لینے والے برطانیہ کے پہلے ہند نژاد وزیراعظم ہوں گے، ہندوستان کے لیے قابل فخر لمحات

وقت کی ٹھوکر میں ہے کیا حکومت کیا سماج!!

ہندوستان پر 200 سال قبضہ اور حکومت کرنے والے انگریزوں کے ملک برطانیہ کے
وزیراعظم کی حیثیت سے اب ہند نژاد رشی سوناک عہدہ کا جائزہ لیں گے

نئی دہلی:24۔اکتوبر
(سحرنیوزڈاٹ کام/سوشل میڈیا ڈیسک)

ہندوستانی نژاد رشی سوناک 42 سالہ،برطانیہ کی کنزرویٹو پارٹی کے لیڈر منتخب ہوگئے اب وہ وزیراعظم کا عہدہ پر فائز ہونگے۔پیر 24 اکتوبر کو کنزر ویٹو پارٹی کی پارلیمانی کمیٹی نے رشی سوناک کواپنا لیڈرمنتخب کرلیا۔اس مقابلہ میں موجود پینی مورڈانٹ نےدستبرداری اختیار کرلی جومطلوبہ 100 ارکان کی حمایت حاصل کرنے میں ناکام رہے۔

اس سے قبل سابق وزیراعظم بورس جانسن نے بھی اپنا نام واپس لے لیا تھا۔رشی سوناک کو زائداز 200 ارکان پارلیمان کی حمایت حاصل ہوئی۔جبکہ پینی کو صرف 26 ارکان کی تائید حاصل تھی۔دو ماہ قبل ہی رشی سوناک اپنے عہدہ سےمستعفی ہوچکیں وزیراعظم لزٹرس کے مقابل بھی امیدوار تھے لیکن رشی سوناک کی بجائے لزٹرس کو منتخب کیاگیا تھا۔مگر اس مرتبہ رشی سوناک کامیاب ہوگئے۔ہند نژاد رشی سوناک برطانیہ کے ایسے پہلے ہندو وزیراعظم ہوں گے،جو بھگود گیتا پرحلف لیں گے قبل ازیں وہ کابینی وزیر بھی تھے۔

رشی سوناک 12 مئی 1980 کو انگلینڈ میں پیداہوئے۔ان کے آباو اجداد پنجاب سے تعلق رکھتے ہیں۔ان کے والد یش ویر پیشہ سے ڈاکٹر ہیں اور والدہ اوشا ایک فارمیسی چلاتی ہیں۔رشی سوناک کا خاندان 1960ء کی دہائی میں برطانیہ منتقل ہوا تھا۔آکسفورڈ یونیورسٹی سےگریجویشن کے بعد رشی نے اسٹینفورڈ یونیورسٹی سےتعلیم حاصل کی۔

وہیں دوسری اہم بات یہ ہے کہ وزیراعظم برطانیہ کا جلیل القدر عہدہ سنبھالنے والے رشی سوناک انفوسیس کے بانی نارائن مورتی کی دختر اکشتا مورتی سے 2009 میں شادی کی یہ دونوں آکسفورڈ یونیورسٹی میں ہم جماعت تھے۔اس جوڑے کو دختران ہیں۔

سینئر صحافی جاوید جمال الدین جاوید کے مطابق 19 ویں صدی کے اواخر میں،مشہور ہندوستانی مجاہد آزادی دادا بھائی نوروجی،ایک پارسی، پہلے ایشیائی تھے جو برطانوی پارلیمنٹ کے رکن بنے تھے اور انہوں نے بائبل پر ہاتھ رکھ کر اپنے عہدہ کا حلف لینے سے انکار کر دیاتھا۔البتہ انہوں نے پارسی زرتشتیوں کے مقدس مذہبی متن خوردہ اوستا پر حلف لیاتھا۔

اطلاعات کے مطابق کنگ چارلس آج رات سینڈرنگھم سے لندن واپس آرہے ہیں۔برمنگھم میل کے مطابق مستعفی ہوچکیں وزیراعظم لز ٹرس آج رات اپنا استعفیٰ پیش کریں گی۔اور کچھ دیر بعد کنگ چارلس وزیر اعظم کا تقرری لیٹر رشی سوناک کے حوالے کریں گے۔25 اکتوبر، بروز منگل کو رشی سوناک وزیراعظم برطانیہ کےعہدہ کا جائزہ لیں گے۔اس کے بعد کابینہ کا اعلان کیا جائے گا۔

برطانوی خبر رساں ادارے کے مطابق رشی سوناک نے برطانیہ کے سیاسی و عوامی حلقوں میں اس وقت بڑی توجہ حاصل کی جب وہ سابق وزیراعظم بورس جانسن کی وزارت میں وزیر خزانہ کے عہدہ پر فائز تھے۔اس وقت ان کی عمر 39 برس تھی۔
رشی سوناک نے برطانیہ میں کورونا وباء سے نمٹنے کے لیے کامیاب اسکیم متعارف کروائی تھی۔سرمایہ کاری کی کمپنی گولڈ مین سیچس کے سابق تجزیہ کار رشی سوناک برطانیہ کے پہلے ایشیائی نژاد وزیراعظم بھی ہوں گے۔

اردو ویکیپیڈیا کےمطابق برطانوی راج میں انگریزوں نے 1757 سے 1947 تک زائداز 200 سال ہندوستان پر حکومت کی۔اور اب یہ نکتہ انتہائی قابل غور اور تاریخی حیثیت کا حامل ہے کہ جس ملک کو انگریزوں نے قبضہ کرکے اپنا غلام بنایا تھا۔اور اس کو آزاد کروانے کے لیے لاکھوں مجاہدین آزادی نے اپنی جانیں دے کرہندوستان کو آزاد کروایا تھا۔اب اس نژاد سپوت رشی سوناک برطانیہ کے وزیراعظم بننے جارہے ہیں۔
ساحر لدھیانوی نے کبھی کہا تھا کہ

وقت سے دن اور رات وقت سے کل اور آج
وقت کی ہر شے غلام وقت کا ہر شے پہ راج
٭٭
وقت کی پابند ہیں آتی جاتی رونقیں
وقت ہے پھولوں کی سیج وقت ہے کانٹوں کا تاج
٭٭
آدمی کو چاہیے وقت سے ڈر کر رہے
کون جانے کس گھڑی وقت کا بدلے مزاج