تلنگانہ کی عزت نفس خریدنے آئے بروکرز چنچل گوڑہ جیل پہنچ گئے، وزیراعظم پر شدید تنقید : چیف منسٹر کے سی آر کامنوگوڑو میں خطاب

تلنگانہ کی عزت نفس خریدنے آئے بروکرز چنچل گوڑہ جیل پہنچ گئے
ٹی آر ایس ایم ایل ایز کی خریدی معاملہ کے ثبوت دہلی کا تخت ہلادیں گے
وزیراعظم پر شدید تنقید،گدھوں کو گھاس ڈالنے سے گائے دودھ نہیں دیتی
چیف منسٹر چندراشیکھرراؤ کا منوگوڑو کے انتخابی جلسہ سے خطاب

حیدرآباد: 30۔اکتوبر(سحرنیوزڈاٹ کام)

چیف منسٹر تلنگانہ کے۔چندراشیکھرراؤ نے آج بی جے پی کو سخت نشانہ بناتے ہوئے کہا کہ تلنگانہ کے عوام کی عزت نفس خرید نے کے لیے دہلی سے آنے والے بروکرز چنچل گوڑہ جیل پہنچ گئے۔منوگوڑو اسمبلی حلقہ میں 3 نومبر کوہونے والی رائے دہی کے پیش نظر آج چیف منسٹر کے سی آر نلگنڈہ ضلع کے چنڈوربلدی حدود میں موجودبنگاری گڈہ میں منعقدہ جلسہ عام سےخطاب کررہےتھے۔جس میں ہزاروں افراد نے شرکت کی۔

اس انتخابی جلسہ عام سے اپناخطاب جاری رکھتےہوئے چیف منسٹر تلنگانہ کے۔چندراشیکھرراؤ نے وزیراعظم پر تنقید کرتے ہوئے ان سے سوال کیاکہ کیا وزیراعظم سےبڑا کوئی اورعہدہ ہےاس ملک میں؟ انہوں پوچھا کہ عوام نے انہیں دو بار وزیراعظم بنایا تو پھر بھی وہ کیوں ایسی حرکتیں کررہے ہیں۔؟

ساتھ ہی چیف منسٹر تلنگانہ کے سی آر نے یہ سنسنی خیز انکشاف کیا حالیہ ٹی آر ایس ایم ایل ایز کی خریدی کے معاملہ میں ان کے پاس ایسے ثبوت و شواہد موجود ہیں جو بی جے پی کے دہلی کے تخت کو ہلاسکتے ہیں۔اور آنے والے دنوں میں یہ تمام باہر آئیں گے۔ساتھ ہی چیف منسٹر نے ریاستی بی جے پی قائدین کی جانب سے مختلف بیانات کا مضحکہ اڑاتے ہوئے کہا کہ چونکہ وہ ایک اہم عہدہ پر فائز ہیں اور معاملہ عدالت میں زیردؤراں ہے تو وہ اس سلسلہ میں مزید کوئی انکشافات نہیں کرسکتے۔

انہوں نے کہا کہ عوام نے دو چار دنوں کے دؤران جو دیکھا یا سنا ہے وہ کچھ بھی نہیں ہے۔بلکہ یہ معاملہ بہت بڑا ہےجس سے دہلی کا تخت دھول دھول ہوجائے گا۔اور آنے والے دنوں میں یہ تمام حقائق باہر آئیں گے۔

چیف منسٹر تلنگانہ کے۔چندراشیکھراؤ نے اس جلسہ سے اپنے خطاب میں وزیراعظم نریندرمودی پر ریمارک کیا کہ وہ” وشوا گرو ہیں،یا وِش(زہر) گرو ہیں۔؟”جو بار بار خود کو وشوا گرو کہتے پھرتے ہیں۔ساتھ ہی انہوں نے بی جے پی کوفرقہ پرست پارٹی قرار دیتےہوئےرائےدہندوں سےاپیل کی کہ ملک میں بدامنی پرمشتمل سیاست کرنے اور ریاستی حکومتوں کو گرانے میں مصروف بی جے پی کو شکست دی جائے۔ 

کے سی آر نے مطالبہ کیاکہ وزیراعظم قوم کو جواب دیں کہ اس سے ملک اور قوم کو کیا فائدہ ہورہا ہے؟ چیف منسٹر نےسوال کیا کہ مودی اور آر ایس ایس کے اہم لوگوں کے بنا اشارہ اور ہدایت کے ہی تینوں بروکرز حیدرآباد آکر ٹی آر ایس کے ارکان اسمبلی کو خریدنے کی کوشش میں چنچل گوڑہ جیل پہنچ گئے؟

چیف منسٹر نےمطالبہ کیاکہ ان کے پاس کروڑوں روپئے کہاں سے آئے؟اس کی تحقیقات ضروری ہیں۔ساتھ ہی شدید برہمی کااظہارکرتے ہوئے چیف منسٹر کے سی آر نے کہا کہ اس معاملہ کے پیچھے جو کوئی موجود ہیں وہ فوری اپنے اپنے عہدوں سےمستعفی ہوجائیں۔جنہیں ایک منٹ بھی دستوری عہدہ پر بنے رہنا کا اخلاقی حق حاصل نہیں ہے۔انہوں نے عوام سےسوال کیاکہ آزادی کے 75 سال بعدبھی ملک میں بے چینی اور بدامنی کیا قابل قبول ہے؟

محاوروں کے برملا استعمال کےلیے اپنی ایک خاص پہچان رکھنےوالے چیف منسٹر تلنگانہ کے۔چندراشیکھرراؤ نے اشارتاًمنوگوڑو کےرائے دہندوں کو مخاطب کرتے ہوئے کہا کہ” گدھوں کو گھاس ڈالنے سے گائے دودھ نہیں دیتی،اور گھاس ڈالتےوقت دیکھناضروری ہوتاہےکہ وہ گھاس گدھوں کو ڈال رہے ہیں یا گائے کو”۔ ا

نہوں نے تمام شعبہ جات سے تعلق رکھنے والوں کو مشورہ دیا کہ وہ خاموش نہ رہیں ،یہی خاموشی ایک دن سب کے لیے بددعا بن جائے گی۔انہوں نے کہا کہ ہر معاملہ میں سماج کا اہم اورتعلیم یافتہ طبقہ خاموش نہ رہیں کہ اس سے ہمارا تعلق نہیں ہے۔انہوں نے رائے دہندوں سے بھی اپیل کی کہ وہ تمام پہلوؤں پر غورکرنے کے بعد ہی اپنے حق رائے دہی کا استعمال کریں۔اورہرگز کسی کےبھی بہکاوے یابلند بانگ دعوؤں کا ہرگز شکا ر نہ ہوں۔اپنا ووٹ اپنی اور حلقہ کی ترقی کے لیے استعمال کریں۔چیف منسٹر کے سی آر نے کہا کہ پھل کھانے کی نیت ہو توجنگلی درختوں پر پھل نہیں آتے بلکہ پھل دینے والے درخت کا پودہ بھی سوچ سمجھ لگاکر لگانا پڑتا ہے۔

قبل ازیں چیف منسٹر نے اپنے ساتھ موجود ان چار ایم ایل ایز کو اس جلسہ میں پیش کرتےہوئے کہا کہ میرے ساتھ یہ چاروں فرزندان تلنگانہ بھی منوگوڑو آئے ہیں جنہیں فارم ہاؤز میں خریدنے کے لیےکروڑوں روپئے کا لالچ دیا گیا تھا کہ وہ ٹی آر ایس پارٹی چھوڑدیں تاہم ایم ایل اے تانڈور پائلٹ روہت ریڈی،ایم ایل اے اچم پیٹ گووالا بال راجو،ایم ایل اے کولہاپور ہرش وردھن ریڈی اور ایم ایل اےپینا پاکاریگا کانتا راؤ نے ان بروکرز  کو اپنے دائیں پیر کی چپل سے مار کر کہا کہ وہ تلنگانہ کےعوام کی عزت نفس کا سودہ نہیں کریں گے۔اور بتادیا کہ وہ بازار میں رکھی ہوئی برائے فروخت اشیاء نہیں ہیں۔انہوں نے کہا کہ اس طرح ان چاروں ایم ایل ایز نے تلنگانہ کی عزت نفس کوہمالیہ کی اونچائی تک پہنچاتے ہوئے تلنگانہ کو بچایا ہے۔

چیف منسٹر کے سی آر نے اپنے خطاب میں استفسار کیا کہ سینکڑوں کروڑ روپیوں کے ذریعہ ارکان اسمبلی،ارکان پارلیمان اور دیگر کو جانوروں کی طرح خریدتے ہوئے حکومتیں گرانا کہاں تک درست ہے؟

چیف منسٹر کے۔چندرا شیکھرراؤ نے سوال کیا کہ کیوں ریاستی وزیر برقی جگدیش ریڈی پر پابندی عائد کرتے ہوئے انہیں منوگوڑو کی انتخابی مہم سے دور رکھا گیا؟انہوں نے کونسی غنڈہ گردی کی تھی اور کس کو ڈریا دھمکایا تھا؟جبکہ ٹی آر ایس پارٹی کا ہی ایسا کوئی ریکارڈ نہیں ہے۔ساتھ ہی چیف منسٹر نے کہا کہ 20 سال میں پہلی مرتبہ وہ ایسے جلسہ عام سے خطاب کررہے ہیں جس کے اسٹیج پر جگدیش ریڈی موجود نہیں ہیں اور اس کا انہیں شدید افسوس ہے؟

چیف منسٹر کے۔چندراشیکھرراؤنے اس جلسہ عام سے اپنےخطاب میں کہاکہ عوام ہی ان کی طاقت ہیں اور اسی طاقت کےذریعہ وہ آگے بڑھتے ہیں۔اور وہ عوامی طاقت کےبغیر کچھ بھی نہیں ہیں۔چیف منسٹر نے کہا کہ برقی میٹر لگانےوالوں کو کوئی بھی موقع دیاگیا تو انہیں بازو ہٹادینے گا، کے سی آر کو توڑنے اور تلنگانہ پر قبضہ کرنے کامنصوبہ بنایاگیاہے۔چیف منسٹر نےمنوگوڑو کےرائے دہندےان ضمنی انتخابات میں ایسی طاقتوں کو سبق سکھائیں۔