کوروناوبا،عیدالفطر کی خریداری اور نماز عیدالفطر کی ادائیگی
آل انڈیا مسلم پرسنل لابورڈ کی مسلمانانِ ہند سے اپیل
حیدرآباد:10۔مئی(سحرنیوزڈاٹ کام/پریس نوٹ)
حضرت مولانا سید محمد رابع حسنی ندوی صدر آل انڈیا مسلم پرسنل لا بورڈ،
حضرت مولانا فخر الدین اشرف جیلانی سجادہ نشین کچھوچھ شریف،
حضرت مولانا سید محمد ارشد مدنی صدر جمعیۃ علماء ہند،
جناب سید سعادت اللہ حسینی امیر جماعت اسلامی ہند،
حضرت مولانا سیدمحمود اسعد مدنی جنرل سکریٹری جمعیۃ علماء ہند،
حضرت مولانا اصغر علی امام مہدی سلفی امیر مرکزی جمعیت اہل حدیث ہند،
حضرت علامہ سید کلب جواد نقوی جنرل سکریٹری مجلس علماء ہند و امام جمعہ لکھنؤ
اورحضرت مولانا خالدسیف اللہ رحمانی کارگزار جنرل سکریٹری آل انڈیا مسلم پرسنل لا بورڈ
نے اپنے مشترکہ بیان میں کہا کہ زندگی اور صحت کی حفاظت ایک شرعی فریضہ ہے، نیز وبائی امراض کے پھیلاؤ کے موقع پر حفاظتی تدبیر اختیار کرنا بھی ایک ضروری عمل ہے،اور خود محسن انسانیت حضور صلی اللہ علیہ وسلم نے تلقین فرمائی ہے کہ جہاں وبائی مرض پھوٹ پڑا ہو، وہاں کے لوگ دوسرے مقامات پر نہ جائیں اور دوسری جگہوں کے لوگ وہاں جانے سے احتیاط کریں۔
اس پس منظر میں تمام مسلمان بھائیوں سے اپیل کی جاتی ہے کہ
٭٭ عید کے موقع سے دکانوں پر ہجوم نہ لگائیں بلکہ سادگی کے ساتھ عید منانے کی کوشش کریں۔
٭٭ عیدالفطر کی نماز میں بھی بڑے مجمع سے اجتناب کریں اور مختصر جماعتیں بنائیں۔
٭٭ عید کی نماز میں دو صفوں کے درمیان ایک صف کا اور دو نمازیوں کے درمیان ایک میٹر کا فاصلہ رکھیں۔
٭٭ ماسک لگانے کا پورا اہتمام کریں۔
٭٭ زبانی مبارکباد دینے پر اکتفا کریں،مصافحہ اور معانقہ سے اجتناب کریں۔
اورمختلف علاقوں میں حکومت نے جو گائیڈ لائن مقرر کی ہے، اس کی پابندی کریں۔
