وقار آباد ضلع کے اننت گیری گھاٹ پر آر ٹی سی بس کا بڑا سانحہ ٹل گیا، ڈرائیور پرکاش کی بروقت حاضر دماغی، 66 مسافر محفوظ

وقار آباد ضلع کے اننت گیری گھاٹ پر آر ٹی سی بس کا بڑا سانحہ ٹل گیا

ڈرائیور پرکاش کی بروقت حاضر دماغی، 66 مسافر محفوظ

مسافرین،سرکل انسپکٹر و سب انسپکٹر پولیس نے ڈرائیور کی بھرپور ستائش کی

وقارآباد/تانڈور: 22۔اکتوبر (سحرنیوزڈاٹ کام)

ضلع وقارآبادمستقر سے 6 کلومیٹر کی دوری پر موجود اننت گیری گھاٹ جسے تلنگانہ کا اوٹی بھی کہا جاتا ہے پر آج رات خوش قسمتی سے اس وقت ایک خوفناک حادثہ ٹل گیا جب گھاٹ سے اترنے کے دؤران حیدرآباد سے تانڈور آرہی ایک آر ٹی سی بس کےبریک فیل ہوگئے۔تاہم ڈرائیور کی حاضر دماغی اور تجربہ نے اس حادثہ کو ٹال دیا۔اسی حالت میں ڈرائیور نےاپنے اوسان پرقابو رکھتے ہوئے بس کو گھاٹ سے اتار کر موضع کیرلی کے قریب کسی طرح روکنے میں کامیابی حاصل کی۔

آج رات دس بجے کے قریب پیش آئے اس واقعہ کی تفصیلات کے مطابق تانڈور ڈپو سے وابستہ آر ٹی سی بس نمبر AP 29 Z 3436 حیدرآباد سے براہ وقارآباد تانڈور آرہی تھی۔وقارآبادبس اسٹانڈ میں مسافرین کواتارنے کے بعد اس میں تانڈور اور دھارور آنے والے مسافر سوار ہوئے۔

بس وقارآباد بس اسٹانڈ سے تانڈور کےلیے روانہ ہوئی۔جب یہ بس جس میں 66 مسافر سوار تھے اننت گیری ہلز پرپہنچی اور اس کے گھاٹ سے اتر رہی تھی جو کہ تین کلومیٹر طویل ہے اور اس گھاٹ پر کئی خطرناک موڑ بھی ہیں۔اچانک اس بس کے ڈرائیور پرکاش نائیک نے محسوس کیا کہ بس کے بریک کام نہیں کررہے ہیں۔جبکہ بس کے اترنے کے دؤران اس گھاٹ پر مزید تیز رفتاری سے دؤڑتی ہے۔تاہم بس ڈرائیور پرکاش نے انتہائی حاضر دماغی اور اپنے اعصاب پر مکمل قابو رکھتے ہوئے مسافرین کومحسوس ہونے نہیں دیا کہ جس بس میں وہ سفر کررہے ہیں اس بس کے بریک فیل ہوگئے ہیں۔

اپنے دیرینہ تجربہ اور حاضر دماغی کےساتھ اس بس کو مکمل گھاٹ جس کی دونوں جانب گہری کھائیاں موجود ہیں سے حفاظت کے ساتھ اتارنے میں ڈرائیور پرکاش کامیاب ہوگئے۔اور بس کو گھاٹ کے اترنے کے بعد زائداز دیڑھ کلومیٹر کے فاصلہ پر موجود کیرلی موضع کے اسکول کےقریب کسی طرح روکنے میں کامیاب ہوگئے۔

جب بس کو روک دینے کے بعد انہوں نے اس بس کے کنڈاکٹر نام دیو اور مسافرین کو بتایا کہ گھاٹ پر بس کے بریک فیل ہوگئے تھے تو یہ سن کر مسافرین کے اوسان خطا ہوگئے۔اور انہوں نے بس ڈرائیور پرکاش کے تجربہ اور ان کی جانب سے بحفاظت بس کو گھاٹ سے اتارتے ہوئے 66 مسافرین کی جان بچانے پر ان کا شکریہ ادا کیا۔

ایک عینی شاہد مسافرنے سحرنیوزڈاٹ کام کے نمائندہ کو بتایا کہ کئی مسافرین اتنے جذباتی اور آبدیدہ ہوگئے تھے کہ انہوں نے بس ڈرائیور پرکاش کے پیر پکڑ کر ان کا شکریہ ادا کرتے ہوئے ان کی بلائیں لیں۔

اطلاع پر سرکل انسپکٹر پولیس دھارور تروپتی راجو اور سب انسپکٹر پولیس نریندر فوری جائےمقام پر پہنچ گئے اور بس ڈرائیور پرکاش کی زبردست ستائش کرتے ہوئے ان سے کہا کہ انہوں نے بس میں موجود 66 مسافرین کی جان بچائی ہے جو کہ لائق ستائش ہے۔

اس سلسلہ میں سحرنیوز ڈاٹ کام کے نمائندہ سے فون پر بات کرتے ہوئے اس بہادر و جانباز بس ڈرائیور پرکاش نےبتایاکہ بس تانڈور کے اپنے واپسی کے سفر پرحیدرآباد سے رات 8 بجے روانہ ہوئی تھی۔بعدازاں وقارآباد بس اسٹانڈ میں توقف کےبعد وقارآباد سے تانڈور کے لیے ان کی بس روانہ ہوئی۔انہوں نے بتایا کہ اننت گیری گھاٹ تک سب ٹھیک تھا لیکن گھاٹ سے اترنے کے دوران جب انہوں نے ایک موڑ پر بس کی رفتار مزید کم کرنے کی غرض سے بریک لگانا چاہا تو بریک رول ہوگئے تھے اور بس کے بریک مکمل طورپر کام نہیں کررہے تھے۔

بس ڈرائیور نے نمائندہ سحرنیوز ڈاٹ کام کو بتایا کہ ان کو یقین تھاکہ اگر یہ بات بس کے کنڈاکٹر یا بس میں موجود 66 مسافرین کو بتائی جائے تو وہ خوفزدہ ہوجائیں گے اور بس میں چیخ و پکار شروع ہوجائے گی۔اس لیے انہوں نے اپنے اعصاب پر قابو رکھتے ہوئے بلاء خوف و خطر بس کو گھاٹ سے بحفاظت اتار لیا۔

اور جب بس کی رفتار کوکسی طرح گیروں کی مدد سے قابو میں کرتے ہوئے موضع کیرلی کے قریب بس کو روکنے میں کامیاب ہوگئے تو خود انہیں بھی اطمینان ہوا کہ وہ بس پر قابو پاتے ہوئے مسافروں کی جان بچانے میں کامیاب ہوگئے۔اس کے بعد ہی انہوں نے کنڈاکٹر اور مسافرین کو یہ بات بتائی کہ گھاٹ پر اترنے کے دؤران بریک فیل ہوگئے تھے۔

جو بھی ہواس سلسلہ میں اس بس کے ڈرائیور پرکاش کی جتنی تعریف کی جائے اتنی کم ہے۔44 سالہ ڈرائیور پرکاش کا 2011 میں مستقل ڈرائیور کی حیثیت سے محکمہ آر ٹی سی میں تقرر ہوا تھا۔بعدازاں ڈپو مینجئر تانڈور کو اس واقعہ کی اطلاع دی گئی تو آر ٹی سی ڈپو تانڈور کے عہدیدار ایک بس کے ذریعہ موضع کیرالی پہنچے۔بس ڈرائیور پرکاش کی بہادری اور ڈیوٹی کے تئیں ان کی ذمہ داری و فرض شناسی کی سراہنا کی۔اور اس بس کے ذریعہ تمام مسافرین کو تانڈور منتقل کیا گیا۔

۔۔۔۔۔ یہ بھی پڑھیں ۔۔۔۔۔۔۔

” اننت گیری ہلز کے ویڈیوز اور خصوصی رپورٹ اس لنک پر "

تم ساتھ دو تو چلیں ہم آسماں تک: کیرالا کا کافی شاپ چلانے والا ضعیف جوڑا جو اب بیرون ممالک کے 26ویں دؤرہ کے لیے تیار ہے

وقار آباد ضلع کے اننت گیری گھاٹ پر آر ٹی سی بس کا بڑا سانحہ ٹل گیا، ڈرائیور پرکاش کی بروقت حاضر دماغی، 66 مسافر محفوظ

Share this post:

جواب دیں جواب منسوخ کریں

Share this post:

متعلقہ پوسٹ

حیدرآباد ایئر پورٹ پر سنگا پور سے آنے والے مسافر کے قبضہ سے 41 کروڑ 44 لاکھ روپئے مالیتی زائد از 6 کلو ہیروئن ضبط

حیدرآباد کے قریب ٹول پلازہ پر کار سے12کروڑ روپئے مالیتی 25 کلو سونا ضبط ، تین گرفتار

تلنگانہ میں کوویڈمتاثرین کی تعداد میں کمی کا سلسلہ جاری،آج 1,933افراد متاثر،3,572 متاثرین صحتیاب

جواب دیں جواب منسوخ کریں