فرقہ پرستی کے مخالف مشہور فلم اداکار پرکاش راج کا ہسپتال کے بستر سے انوکھا ٹوئٹ
حیدرآباد:11۔اگست(سحرنیوزڈاٹ کام)
مشہور فلم اداکار پرکاش راج جنہوں نے تلگو ،ٹامل ، کنڑا،ملیالم اور کئی ہندی فلموں میں زیادہ تر ویلن کے کردار بخوبی نبھائے ہیں وہیں چند فلموں میں پرکاش راج نے کیرکٹر ایکٹر کے رول بھی بخوبی نبھائے ہیں۔
فلموں میں بھلے ہی پرکاش راج نے ویلن کے خوفناک کردار ادا کرتے ہوں لیکن وہ اکثر میڈیا اور سوشل میڈیا پر مرکزی حکومت کے علاوہ فرقہ پرست طاقتوں کو نشانہ بناتے رہتے ہیں۔
بالخصوص ٹوئٹر پر پرکاش راج JustAsking# کے ہیاش ٹیاگ کے ذریعہ فرقہ پرست طاقتو ں اور ہندتوا کے حامیوں کو چھیڑتے رہتے ہیں جس کی وجہ سے انہیں اکثر ٹرال بھی کیا جاتا ہے۔
پرکاش راج جو کہ خود کو ملحد بتاتے ہیں ٹوئٹر ، فیس بک اور انسٹا گرام پر ملک کے مختلف مقامات پر ہونے والی موب لنچنگ،لڑکیوں کی عصمت ریزی اور قتل کے خلاف ہمیشہ سوال اٹھاتے رہتے ہیں۔
شاہین باغ میں ہوئے این آرسی مخالف احتجاج کی تائید، دہلی فسادات کی مذمت اور دیگر واقعات کی مذمت میں وہ ہمیشہ آگے رہے ہیں۔ پرکاش راج 2019ء کے لوک سبھا الیکشن میں بہار کے بیگو سرائے پارلیمانی حلقہ میں کنہیا کمار کے لیے انتخابی مہم میں حصہ لے چکے ہیں۔
دراصل کل پرکاش راج چنئی میں فلم دھنش کی شوٹنگ کے دؤران فلم کے سیٹ پر گرکر زخمی ہوگئے تھے جس سے ان کے ہاتھ میں فریکچر ہوا تھا
اس کی اطلاع خود پرکاش راج نے اپنے ٹوئٹ کے ذریعہ دیتے ہوئے لکھا تھا کہ زخمی ہاتھ کی سرجری کے لیے وہ حیدرآباد میں مقیم ان کے دوست ڈاکٹر گرواریڈی کے پاس پہنچ رہے ہیں۔انہوں نے لکھا تھا کہ ان کی صحت بہتر ہے فکر کی کوئی بات نہیں ہے۔
وہیں آج شام اداکار پرکاش راج نے ہسپتال کے بستر پر لی گئ ان کی ایک تصویر ٹوئٹر پر پوسٹ کی ہے جس میں ان کے ایک ہاتھ پر پلاسٹر بندھا ہوا ہے۔
اس تصویر کے ساتھ پرکاش راج نے اپنے ٹوئٹ میں لکھا ہے کہ ” شیطان ( بھوت،بدمعاش) واپس آگیا ہے "،سرجری کامیاب ہوگئی ہے،شکریہ میرے پیارے دوست ڈاکٹر گروا ریڈی،اور آپ تمام کی محبتوں اور دعاؤں کے لیے شکریہ،جلد ہی ایکشن میں واپسی ہوگی "
یاد رہے کہ پرکاش راج ایک مشہور اور مقبول فلم اداکار مانے جاتے ہیں جنہوں نے سلمان خان کے ساتھ ہندی فلموں وانٹیڈ ،دبنگ اور اجئے دیوگن کے ساتھ فلم سنگھم کے ساتھ ساتھ انٹرٹینمنٹ ،گول مال کے علاوہ دیگر فلموں میں کام کرچکے ہیں۔جبکہ تلگو کی کئی مشہور اور بڑے بجٹ کی فلموں میں بھی پرکاش راج اپنی اداکاری کے جوہر دکھاچکے ہیں۔
اب تک ان کے حصہ میں پانچ نیشنل ایوارڈس کے بشمول کئی فلم فیئر اور مختلف ریاستوں کے کئی اہم ایوارڈس آئے ہیں۔
