تلنگانہ کے تین اضلاع میں 887 کروڑ کی سرمایہ کاری،تین جوٹ مِلوں کا قیام
دس ہزار سے زائد افراد کو ملے گا روزگار،تین یادداشت مفاہمت پر دستخط
ریاستی وزیر آئی ٹی،بلدی نظم و نسق و صنعت کے ٹی آر کا انکشاف
حیدرآباد :17۔ستمبر(سحرنیوزڈاٹ کام)
ریاست تلنگانہ کے تین اضلاع میں مزید 887 کروڑ روپیوں کی سرمایہ کاری کے ذریعہ عصری سہولتوں سے لیس تین جوٹ (پٹ سن) ملوں کا قیام عمل میں لایا جارہا ہے۔
اس سلسلہ میں آج ریاستی وزیر آئی ٹی،بلدی نظم نسق و انڈسٹریز کے۔تارک راماراؤ(کے ٹی آر)،ریاستی وزیر زراعت نرنجن ریڈی اور ریاستی وزیر بی سی ویلفیئر،فوڈ اینڈ سول سپلائیز گنگولا کملاکر کی موجود گی میں سیکریٹری محکمہ صنعت جئیش رنجن نے مذکورہ کمپنیوں کے عہدیداروں کے ساتھ مفاہمت کی یادداشت پردستخط کیے۔
بعدازاں ریاستی وزیر آئی ٹی،بلدی نظم نسق و انڈسٹریز کے۔تارک راماراؤنے کہا کہ ریاست کے تین اضلاع میں ان جوٹ ملوں کے قیام سے 10 ہزار 400 افراد کو روزگار حاصل ہوگا۔
آج کیے گئے اس مفاہمت کی یادداشت کے تحت ریاست تلنگانہ کے اضلاع ورنگل ، کاماریڈی اور راجنا سرسلہ میں یہ جوٹ ملیں قائم کی جائیں گی۔
انہوں نے کہا کہ پلاسٹک کو ترک کیے جانے اور جوٹ (پٹ سن) کے استعمال سے ماحولیات کو بھی فائدہ ہوگا اور جوٹ کا استعمال بھی زیادہ ہوگا اور اس جوٹ سے مختلف روزمرہ قابل استعمال اشیاء تیار کی جائیں گی۔
ریاستی وزیر کے ٹی آر نے کہا کہ ان جوٹ ملوں کو حکومت تلنگانہ تمامتر تعاون فراہم کرے گی اور آنے والے 20 سال میں سول سپلائز کارپوریشن کے ذریعہ جوٹ سے تیار کی جانے والی اشیاء خریدی جائیں گی۔
ریاستی وزیر آئی ٹی،بلدی نظم نسق و انڈسٹریز کے۔تارک راماراؤ نے اس موقع پر کہا کہ ریاست تلنگانہ تیز رفتاری کے ساتھ ترقی کی سمت گامزن ہے اور بالخصوص شعبہ زراعت کے معاملہ میں ریاست تلنگانہ پورے ملک کے لیے ایک مثال ہے۔
کے ٹی آر نے کہا چیف منسٹر کے ۔چندراشیکھرراؤ کی مدبرانہ قیادت میں ریاست میں شعبہ زراعت نے پانچ گُنا ترقی کی ہے۔
ریاستی وزیر آئی ٹی ، بلدی نظم نسق و انڈسٹریز کے۔ تارک راماراؤ نے انکشاف کیا کہ ریاست میں دس ہزار ایکڑ اراضی پر اسپیشل فوڈ پروسیسنگ زونس قائم کیے جارہے ہیں۔
ریاستی وزیر زراعت نرنجن ریڈی اس موقع پر کہا کہ مشن بھاگیرتا اسکیم کو ملک کی کئی ریاستوں نے ایک رول ماڈل کی طرح لیا اور اس کو چیف منسٹر کے سی آر کی دوراندیشی کی ایک مثال کہی جاسکتی ہے۔
جبکہ رریاستی وزیر بی سی ویلفیئر،فوڈ اینڈ سول سپلائیز گنگولا کملاکر نے کہا کہ ہرسال ریاست تلنگانہ کیلئے 50 کروڑ جوٹ کے تھیلوں کی ضرورت پڑتی ہے۔
انہوں نے کہا کہ اب ریاست میں تین جوٹ ملوں کے قیام سے ہزاروں افراد کومختلف طریقوں سے روزگار حاصل ہوگا۔
