تلنگانہ کے آصف آباد ضلع میں 15 لاکھ روپئے مالیتی ٹماٹر سے لدی اُلٹنے والی لاری کو پولیس تحفظ

تلنگانہ کے آصف آباد ضلع میں 15 لاکھ روپئے مالیتی ٹماٹر سے لدی اُلٹنے والی لاری کو پولیس تحفظ
ٹماٹر کی مہنگائی کے لیے میاں مسلم ذمہ دار : چیف منسٹر آسام
مہنگے ہوگئے ہیں تو ٹماٹر کھانا چھوڑ دیں : اتر پردیش کی وزیر کا مشورہ

حیدرآباد: 24۔جولائی (سحرنیوزڈاٹ کام)

گذشتہ چند دنوں سے ٹماٹرکی قیمتیں آسمان چھو رہی ہیں۔عام آدمی کی دسترس سے اب ٹماٹر باہر ہوچکا ہے۔جبکہ ہر پکوان کےلیے ٹماٹر لازمی ہوتا ہے۔ٹماٹر کی آسمان چھوتی قیمتوں کےدرمیان کہیں سے اس کی چوری کی اطلاع موصول ہورہی ہے تو کہیں سے کسان کے قتل اور ٹماٹر لوٹ لینے کی اطلاع،تو ہکوان میں دو ٹماٹر ڈالنےسے برہم بیوی کے گھر چھوڑکر جانے کی اطلاع بھی ریاست بہارسے آچکی ہے۔جاریہ ماہ کے آغاز سے ہی ٹماٹر 150 روپئے تا 250 روپئے فی کلو فروخت ہو رہا ہے۔

اچھے دنوں کی امید دلانےوالی بی جے پی سےتعلق رکھنے والے چیف منسٹر آسام ہیمانتا بسواشرمانے اپنی کوتاہ ذہنی اور فرقہ وارانہ ذہنیت کا مظاہرہ کرتے ہوئےکہاتھا کہ” ٹماٹر کی قیمتوں میں اضافہ کےلیے میاں مسلم ذمہ دار ہیں۔!!”جس کی ہر طرف سے شدید مذمت کی گئی تھی کہ اپنی نااہلی ،ناکامیوں اور کمزوریوں کو چھپانےکےلیے ان کےلیے اس ملک کامسلمان ایک پسندیدہ اورمصیبتوں سے باہر نکالنے والامسیحا بن کر رہ گیا ہے۔کئی سوشل میڈیا صارفین نے تو چیف منسٹر کی ذاتیات پر بھی شدید حملہ کیا تھا۔!!

وہیں کل اسی بی جے پی کی اتر پردیش کی وزیر مملکت برائے بہبود خواتین و بچوں کی غذائیت پرتیبھا شکلا نےعوام کو مشورہ دیا ہے کہ اگر ملک میں مہنگائی کے درمیان سبزیوں کی قیمت ناقابل برداشت لگے تو لوگ ٹماٹر کھانا چھوڑ دیں یا گھر میں اگانا شروع کر دیں۔جس پر سوشل میڈیا پر ان کا مذاق اڑایا جارہا ہے۔کئی صارفین نےلکھا کہ ٹماٹر اور دیگر اشیاء کی مہنگائی پر محترمہ نے یہ مشورہ دیا ہےشکر ہے کہ اس ملک کے عوام نے کپڑے مہنگے ہوجانے کی شکایت نہیں کی۔!!

टमाटर मंहगा है तो खाना छोड़ दीजिए अपने आप सस्ता हो जाएगा"

हरदोई पहुंची उत्तर प्रदेश सरकार में महिला विकास एवं बाल पुष्टाहार विभाग की राज्यमंत्री प्रतिभा शुक्ला ने कहा कि "टमाटर मंहगा है तो खाना छोड़ दीजिए या फिर गमले में लगा लीजिए"#TomatoPrice pic.twitter.com/XbXiySoRaA

— Anurag Verma ( PATEL ) (@AnuragVerma_SP) July 22, 2023

ایسے میں ریاست تلنگانہ کے کومرم بھیم آصف آباد سے موصولہ اطلاع کے مطابق ٹماٹر سے لدی ہوئی ایک لاری کے الٹ جانے کےفوری بعد مقامی پولیس نے اس لاری کو اپنے حصار میں لیتے ہوئے ان ٹماٹروں کا تحفظ کیا۔

تفصیلات کے مطابق کومرم بھیم آصف آباد کے وینکڈی منڈل کے بینڈارا گاؤں میں کل اتوار کی شام ایک ٹماٹر سے لدی ہوئی لاری کے الٹ جانے کے بعد سڑک پر بکھرے ہوئے ٹماٹروں کی چوری کو روکنے کےلیے پولیس نے سیکورٹی فراہم کی۔یہ لاری 15 لاکھ روپے مالیتی ٹماٹر لے کر کرناٹک کے کولار سے نئی دہلی جا رہی تھی۔

سب انسپکٹر آف پولیس وانکیڈی ڈی۔ ساگر نےبتایا کہ ٹماٹروں کو پانچ گھنٹے تک مقامی لوگوں کی جانب سے لوٹ لیے جانے کو روکنے کی غرض سے لاری کے قریب دو پولس جوانوں کو تعینات کیاگیا تھا۔پولیس کانسٹیبلس کو کل شام 6 بجے جائے حادثہ پر بھیجا گیا تھا جو نصف شب تک گاڑی میں ٹماٹروں کو دوبارہ لوڈ کرنے کے بعد واپس آ گئے۔

اطلاعات کےمطابق چند مقامی افراد نے ان ٹماٹروں کو چوری کرنے کی کوشش کی لیکن جائے حادثہ پر پولیس کی موجودگی کو دیکھتے ہوئے وہ اس حرکت میں کامیاب نہ ہوسکے۔پلاسٹک کی ٹرے میں بھرے ہوئے ٹماٹر سڑک پربکھرے پڑے ہوئے تھے،جن پر بہت سےلوگوں کی توجہ مبذول ہوئی۔تاہم چوکس لاری ڈرائیور جس کو حادثے میں معمولی چوٹیں آئیں مقامی پولیس کو فون کرنے میں کامیاب ہو گیا اور ٹماٹروں کے تحفظ کے لیے پولیس کی مدد طلب کی۔

یاد رہے کہ 15 جولائی کو بھی کولار سے نئی دہلی 22 لاکھ روپئے مالیتی ٹماٹر لےجانےوالی ایک اور لاری عادل آباد کے ماوالا منڈل سنٹر میں الٹ گئی تھی اور چار پولس ملازمین نے 12 گھنٹے تک اس لاری اور ٹماٹروں کوتحفظ فراہم کیا تھا۔