تلنگانہ میں نمازِ عیدالاضحیٰ عیدگاہوں میں ادا کرنے کی اجازت،کوویڈ قواعد کی پابندی لازمی
اعلیٰ پولیس عہدیداروں کے ساتھ اجلاس کے بعد ریاستی وزیر داخلہ محمدمحمود علی کا بیان
حیدرآباد:16۔جولائی (سحرنیوزڈاٹ کام/پریس نوٹ)
ریاستی وزیر داخلہ محمدمحمود علی نے آج اپنے دفتر واقع لکڑی کا پُل میں ایک اعلی سطحی اجلاس طلب کیا جس میں پرنسپل سکریٹری روی گپتا، ڈی جی پی ڈاکٹر ایم مہندر ریڈی،محکمہ جیل کے ڈائریکٹر جنرل راجیو ترویدی،ایڈیشنل ڈائریکٹر جنرل راجیو رتن، پولیس کمشنران انجنی کمار،مہیش ایم بھاگوت،وی سی سجنار،محکمہ محابس کے ڈائریکٹر جنرل سنجے کمار جین ورنگل اور حیدرآباد کے پولیس انسپکٹر جنرل ناگی ریڈی اور اسٹیفن رویندر شریک تھے۔
وزیر داخلہ محمدمحمود علی نے ملک بھر کے مسلمانوں بالخصوص تلنگانہ کے تمام لوگوں کو عیدالاضحیٰ کی پیشگی مبارکبا پیش کرتے ہوئے کہا کہ کورونا وباء کی وجہ سے گذشتہ سال عیدین کی نمازوں کو عیدگاہوں میں ادا کرنے کی اجازت نہیں دی گئی تھی۔
مگر اس سال حالات بہتر ہونے کی وجہ سے عیدالاضحیٰ کی نماز کی عام اجازت دی گئی ہے۔ وزیر داخلہ نے کہا کہ عید کی نماز کے اہتمام کے دوران مسلمان احتیاط برتیں اور کوویڈ قوانین کی پابندی کریں۔ کیونکہ کورونا وباء پوری طرح سے ختم نہیں ہوا ہے۔
ان حالات میں کوویڈ قوانین کی پابندی ضروری ہے۔ انہوں نے کہا کہ اس وباء کو روکنے کا اہم ذریعہ ویکسین، فیس ماسک، سماجی فاصلہ اور ہاتھوں کو سینی ٹائزر یا صابن سے بار بار دھونا ہے۔
وزیر داخلہ محمدمحمودعلی نے کہا کہ ریاست بھر کی تمام عیدگاہوں اور مساجد میں نماز عیدالاضحیٰ کے موقع پر سماجی فاصلہ قائم رکھیں،مصافحہ و معانقہ سے پرہیز کریں، فیس ماسک کو ہمیشہ استعمال کریں۔
وزیر داخلہ محمدمحمود علی نے عوام سے اپیل کی کہ وہ کورونا وائرس کے خاتمہ کو اپنی ذمہ داری سمجھیں اور اس کو روکنے میں حکومت تلنگانہ سے تعاون کریں۔
قبل ازیں انہوں نے ریاست کے لا اینڈ آرڈر کا جائزہ ہوئے کہا کہ اس سلسلہ میں کسی قسم کی لاپرواہی نہ برتی جائے۔ وزیرداخلہ نے اعلیٰ پولیس عہدیداروں سے کہا کہ ریاست بھر میں بونال تہوار اور بقرعید کے موقع پر متعلقہ محکمہ جات کی جانب سے تمام ضروری اقدامات کیے جائیں۔اور عوام کو سہولیات فراہم کریں۔
محمدمحمود علی نے کہا کہ عیدالاضحٰی سے تین دن قبل قربانی کے جانوروں کی منتقلی کے لیے عوام کو تحفظ فراہم کیا جائے۔ جس پر اعلیٰ پولیس عہدیداروں نے اثبات میں جواب دیا۔
وزیر داخلہ محمدمحمود علی نے عوام سے اپیل کی ہے کہ قربانی کے لیے ممنوعہ جانوروں کی قربانی سے پرہیز کریں تاکہ دوسروں کو تنقید کا موقع نہ ملے۔
انہوں نے کہا کہ قربانی کے بعد صفائی پر خاص توجہ دیں اور اپنے پڑوسیوں کو کسی قسم کی تکلیف نہ پہنچائیں،اپنی قربانی میں رشتہ داروں، پڑوسیوں، دوست و احباب اور غرباء کا خیال رکھیں،
وزیر داخلہ نے پولیس عہدیداروں سے محکمہ میں مخلوعہ جائیدادوں کی تفصیلات طلب کرنے کے بعد کہا کہ اس موقع سے استفادہ حاصل کرتے ہوئے بے روزگاروں کو روزگار فراہم کیا جائے۔ آخر میں انہوں نے پولیس عہدیداروں سے کہا کہ عیدالاضحیٰ میں عوام کو زیادہ سے ریادہ سہولیات فراہم کریں۔
