فرمانبردار بیٹے نے بزرگ ماں کواپنے کندھوں پر بٹھا کر خانہ کعبہ کا طواف کروایا، سوشل میڈیا پر ویڈیو وائرل، ہرطرف سے ستائش

جس نے اِک عمر دی ہے بچوں کو
اس کے حصے میں ایک دن آیا

فرمانبردار بیٹے نے اپنی ماں کو کندھوں پر بٹھاکر خانہ کعبہ کا طواف کروایا
سوشل میڈیا پر ویڈیو وائرل، ہر طرف سے سعادت مند بیٹے کی ستائش

حیدرآباد : 18۔اپریل
(سحرنیوزڈاٹ کام/سوشل میڈیا ڈیسک)

جب بچے چھوٹے ہوتے ہیں تو مائیں ان کی دیکھ بھال میں کوئی کسر نہیں چھوڑتیں۔بچہ رونے لگ جائے یا پھر اس کو کھیلنے کا شوق ہوتو مائیں اپنے بچوں کو کبھی اپنی پیٹھ پر بٹھاکر خود گھوڑی بن جایا کرتی ہیں یا پھر اپنے بچوں کو اپنے کندھوں پر اٹھاکر پورے گھر کی سیر کرواتی ہیں تو کبھی گود میں اٹھاکر بناء کسی شکوہ و شکایت ہنستے کھیلتے گھر کا سارا کام نپٹالیتی ہیں۔اسی لیے تو ماں کے مقام کو قدرت نے سب سے اوپر رکھا ہے اور اس کے پیروں میں ہی جنت رکھ دی ہے۔

سوشل میڈیا جسے مذہبی منافرت اور ایک مخصوص طبقہ کونشانہ بنانے کا اڈہ بنا کر رکھ دیا گیا ہے۔اسی سوشل میڈیا کےمختلف پلیٹ فارمز پر کئی دلنشین ویڈیوز کےساتھ سبق آمیز ویڈیوزبھی بہت زیادہ تعداد میں شیئر کیےجاتے ہیں اور انہیں دیکھنے والوں کی تعداد بھی لاکھوں میں ہوتی ہے۔

گزشتہ چند دنوں سے سوشل میڈیا پر ایک انتہائی دلنشین اور ضعیف ماں کے تئیں ایک فرمانبردار بیٹے کا ایک ایسا ویڈیو وائرل ہوا ہے جسے دیکھ کر آنکھیں نم ہوجاتی ہیں اور اس سعادت مند بیٹے کی اس خدمت اور ماں جیسی عظیم ہستی سے اس کی محبت کو دیکھ کر کہا جاسکتا ہے کہ وہ اپنی جنت اپنے کندھوں پر اٹھاکر اللہ کے گھر کا خود بھی طواف کر رہا ہے اور اپنی ضعیف ماں کو بھی طواف کروا رہا ہے۔

بالخصوص ماہ رمضان المبارک میں ساری دنیا کے مسلمان عمرہ کی ادائیگی کے لیے مکہ مکرمہ و مدینہ منورہ پہنچتے ہیں۔گزشتہ دو سالوں کے دوران کوویڈ وبا کے باعث مسلمان اس سعاد ت سے محروم رہے تھے۔تاہم جاریہ سال سوشل میڈیا پر وائرل ویڈیوز کو دیکھ کر اندازہ لگایا جاسکتا ہے کہ اس سال دنیا کے مختلف ممالک کے لاکھوں مسلمانوں نے عمرہ کی سعادت حاصل کی اور یہ سلسلہ ہنوز جاری ہے۔اور اس عمرہ کی ادائیگی کے روحانی اور دلنشین ویڈیوز سوشل میڈیا پر وائرل ہیں۔

"17 اپریل 2023،مطابق 27 رمضان المبارک،مختلف ممالک کےلاکھوں عمرہ زائرین خانہ کعبہ کا طواف کرتے ہوئے "

https://www.facebook.com/khanyahiya276/videos/610286191020832

ایسا ہی ایک دلنشین اور خوبصورت ویڈیو سوشل میڈیا کےمختلف پلیٹ فارمز پر وائرل ہوا ہے۔اس ویڈیو میں دیکھا جاسکتا ہے کہ خانہ کعبہ میں ایک شخص اپنی بزرگ والدہ محترمہ کو اپنے کندھے پر بٹھا کر طواف کروا رہا ہے۔تاہم یہ معلوم نہیں ہوپایا ہےکہ یہ نوجوان اور اس کی ماں کا تعلق کونسے ملک سے ہے۔؟

اپنی ماں کو کندھوں پر اٹھا کر اللہ کے گھر کے گرد طواف کرنے والے اس نوجوان کے چہرہ پر دیکھی جانے والی خوشی و انبساط کا نظارہ قابل دید اور لائق صد ستائش ہے۔اس ویڈیو میں دیکھا جاسکتا ہے کہ اپنے بیٹے کے کندھے پر بیٹھیں بزرگ والدہ بھی خوشی خوشی طواف کرنے میں مصروف ہیں۔طواف کے دوران اپنے بیٹے کے کندھے پر بیٹھیں ماں کبھی کبھی جھک کر اپنے اس سعادت مند بیٹے سے کچھ پوچھ لیتی ہیں اور کبھی خوشی کے جذبات سے اپنے اس بیٹے کی پیشانی بھی سر کے اوپر سے چوم لیتی ہیں۔

” سعادت مند فرزند اور بزرگ ماں کے طواف کا دلنشین و خوبصورت نظارہ ”

https://www.facebook.com/khanyahiya276/videos/608387474537686

سوشل میڈیا پر اس ویڈیو کی زبردست ستائش کی جارہی ہے۔جہاں اس فرمانبردار بیٹےکےحق میں دعائیں دی جارہی وہیں بیٹے کےکندھے پر سوار طواف میں مصروف بزرگ ماں کوبھی خوش نصیب لکھاجارہاہےکہ رشتوں کی پامالی،دھوکہ دہی اور مکر و فریب کےاس دؤر میں بھی اس بزرگ خاتون کے پاس ایسے فرمانبردار بیٹا موجود ہے جو کسی بھی والدین کے لیے ایک خدائی عطیہ سے زیادہ کچھ بھی نہیں۔!

ماہ جنوری میں بھی ایک ایسا ہی روحانی اور دلنشین ویڈیوسوشل میڈیا پر وائرل ہواتھا۔جس میں دیکھا گیا تھا کہ ایک ہونہار بیٹا اپنی ضعیف ماں کو اپنی پیٹھ کر بٹھاکر خانہ کعبہ کا طواف کروایا تھا۔

ایسے ویڈیوز ان غیر ذمہ دار اور والدین کے نافرمان نوجوانوں اور دیگر کے لیے ایک پیغام دیتے ہیں کہ ماں باپ زندگی بھر اپنی ساری خدمات و قربانیوں کا صلہ کبھی طلب نہیں کرتے اور نہ کسی امید اور صلہ کی توقع کے ساتھ اپنی اؤلاد کی پرورش کرتے ہیں۔ساری زندگی اس کو ایک ذمہ داری کے طور پر خود کو حالات کی شدید تپش میں جلا کر اپنی اولاد کے لیے سایہ فراہم کرتے ہیں۔

ایسے میں اولاد کا بھی فرض ہوتا ہے کہ اپنے والدین کی ضعیفی میں ان کےلیے ایک مضبوط سہارا بنیں۔تاکہ انہیں کسی لاٹھی کے سہارے کی ضرورت محسوس نہ ہو۔!!

” ماہ جنوری میں عمرہ کے دؤران وائرل شدہ ویڈیو "

https://www.facebook.com/100009772660322/videos/904314110703238/

ترتیب و پیشکش : یحییٰ خان 

https://www.facebook.com/khanyahiya276

https://www.instagram.com/khan_yahiya276/