آٹھویں نظام پرنس مکرم جاہ بہادر کا جسد خاکی استنبول سے حیدرآباد لایا گیا، مکہ مسجد میں سرکاری اعزازات کے ساتھ کل 18جنوری کو تجہیز و تکفین

آٹھویں نظام پرنس مکرم جاہ بہادر کا جسد خاکی استنبول سے حیدرآباد لایا گیا
حسب خواہش مکہ مسجد میں سرکاری اعزازات کے ساتھ کل 18 جنوری کو تجہیز و تکفین 
وزیراعلیٰ،بیرسٹراویسی،وزیر داخلہ کے علاوہ دیگر نے چومحلہ پیالیس میں نعش کا آخری دیدار کیا

حیدرآباد : 17۔جنوری(سحر نیوز ڈاٹ کام)

سابق ریاست حیدرآباد دکن کے آخری فرمانروا پرنس مکرم جاہ بہادر کےجسد خاکی کو آج ترکی کے شہر استنبول سے ایک خصوصی چارٹرڈ طیارہ کے ذریعہ حیدرآباد کےشمس آباد انٹرنیشنل ایر پورٹ لایا گیا۔جہاں سے ایک خصوصی ایمبولنس کے ذریعہ ان کے جسد خاکی کو چومحلہ پیالیس،خلوت منتقل کردیا گیا۔

یہاں یہ تذکرہ غیر ضروری نہ ہوگا کہ آصف سابع نواب میرعثمان علی خان بہادر کے پوتے اور پرنس آف برار میر حمایت علی خان اعظم جاہ بہادر و شہزادی درشہوار کےفرزند آصف جاہ ثامن نواب میر برکت علی خان کےآخری فرمانرواں پرنس مکرم جاہ بہادر کا 14 جنوری کو ہندوستانی معیاری وقت کے مطابق رات 50-10 بجے پر ترکی کے شہر استنبول میں انتقال پُرملال ہوا تھا۔ان کی عمر 90 سال تھی۔

چومحلہ پیالیس میں آصف جاہ ثامن کےجسد خاکی کو شاہی خاندان اور نظام ٹرسٹ کےذمہ داروں اور عوام کے دیدار کے لیے رکھا گیا ہے۔

میت کی منتقلی کےفوری بعد چیف منسٹر تلنگانہ کے۔چندراشیکھرراؤ نے انتہائی ادب و احترام کےساتھ چومحلہ پیالیس پہنچ کر نعش کا آخری دیدار کیا اور جسد خاکی پر گلہائے عقیدت پیش کیے۔ان کےساتھ ریاستی وزیر داخلہ محمدمحمود علی،وزیر عمارات و شوارع وی پرشانت ریڈی،رکن راجیہ سبھا جی۔سنتوش،برسر اقتدار بی آر ایس پارٹی کے رکان اسمبلی سنتوش ریڈی اور بالکا سمن کے بشمول محمدسلیم چیئرمین تلنگانہ اسٹیٹ حج کمیٹی، مسیح اللہ خان چیئرمین تلنگانہ اسٹیٹ وقف بورڈ،جناب اے کے خان سرکاری مشیر برائے اقلیت حکومت تلنگانہ اور دیگر موجود تھے۔

https://www.facebook.com/nationalreporterabuaimal/videos/686359409945112

چیف منسٹر نے میت کے آخری دیدار کے بعد دربار ہال میں بیگم آصف جاہ ثامن پرنسس اسریٰ،فرزند پرنس عظمت جاہ بہادر،دختر محترمہ پرنسس شیکیارکو پرسہ دیتے ہوئے تعزیت کا اظہار کیا اوران سے بات چیت کی۔بعدازاں صدر کل ہند مجلس اتحادالمسلمین و رکن پارلیمان حیدرآباد بیرسٹر اسد الدین اویسی نے بھی چومحلہ پیالیس پہنچ کر جسد خاکی کا دیدار کیا۔