حیدرآباد ایئر پورٹ پر ریاض سے آ نے والے تین مسافروں کے قبضہ سے ایک کروڑ 13 لاکھ روپئے مالیتی 1818 گرام سونا ضبط

حیدرآباد ایئر پورٹ پر ریاض سےآ نے والے تین مسافروں کے قبضہ سے
ایک کروڑ 13 لاکھ روپئے مالیتی 1818 گرام سونا ضبط، مزیدتحقیقات جاری

حیدرآباد: 23/مئی (سحرنیوزڈاٹ کام)

حیدرآباد کے راجیو گاندھی انٹرنیشنل ایرپورٹ RGIA# (شمس آباد ایرپورٹ) پرمحکمہ کسٹمس کے عہدیداروں کی چوکسی کے باعث بیرون ممالک سے بڑی مقدار میں اسمگل یا چھپاکر لایا جانے والا کروڑہا روپئے مالیتی سونا کے علاوہ دیگرممنوعہ اشیا کی ضبطی کا سلسلہ ہنوز جاری ہے۔

18 مئی کی صبح محکمہ کسٹمز ایئر انٹلی جنس یونٹ کےعہدیداروں نے دبئی سے حیدرآباد ایئرپورٹ پہنچنےوالے ایک مسافر کے قبضہ سے 1,761گرام خالص سوناضبط کرلیاتھا۔کسٹمزعہدیداروں کے مطابق اس ضبط شدہ سونا کی جملہ مالیت ایک کروڑ 10 لاکھ 6 ہزار 250 روپئے تھی۔بعدازاں اس مسافر کوکسٹم ایکٹ 1962 کے تحت ضبط شدہ سونا کے ساتھ گرفتار کرلیا گیا تھا۔

اس واقعہ کے پانچ دنوں بعدآج 23 مئی کی صبح محکمہ کسٹمز ایئر انٹلی جنس یونٹ،راجیو گاندھی انٹرنیشنل ایرپورٹ نےریاض (سعودی عرب) سے آنے والے تین مسافروں کےقبضہ سے بڑی مقدار میں سونا ضبط کرلیاہےجسے پیسٹ کی شکل میں ڈھال کر ان تینوں مسافروں نے اپنے جوتوں میں چھپایا تھا۔

محکمہ کسٹمز ایئر انٹلی جنس یونٹ،راجیو گاندھی انٹرنیشنل ایرپورٹ کی اطلاع کےمطابق آج 23 مئی، منگل کی صبح ساڑھے سات بجے مسافرین کی پروفائلنگ کی بنیاد پر حیدرآبادکسٹمز کے ایئر انٹلی جنس یونٹ کے عہدیداروں نے تین مرد مسافروں کو روکا جو ریاض سے فلائٹ نمبر XY-325 کے ذریعہ  پہنچے تھے۔

کسٹمز ایئر انٹلی جنس یونٹ،راجیو گاندھی انٹرنیشنل ایرپورٹ کےعہدیداروں کی جانب سے روک کر ان تینوں مسافروں کی تلاشی لینے پر ان کے جوتوں میں پیسٹ کی شکل میں چھپایا ہوا سونا پایا گیا۔جس کا خالص وزن 1,818.98 گرام ہے۔عہدیداروں کے مطابق اس سونا کی جملہ قیمت ایک کروڑ 13 لاکھ 13 ہزار 558 (1,13,13,558) روپئے ہے جسے ضبط کرلیا گیا۔

کسٹمز ایئر انٹلی جنس یونٹ،راجیو گاندھی انٹرنیشنل ایرپورٹ کےعہدیداروں کےمطابق ان تینوں مسافرین کاتعلق اتر پردیش سے ہے جنہیں تحویل میں لے لیا گیا اور اس سلسلہ میں مزید تحقیقات جاری ہیں۔

https://www.youtube.com/watch?v=QAU9ku2l4og

” یہ بھی پڑھیں "

حیدرآباد ایئر پورٹ پر دبئی سے پہنچنے والے ایک مسافر کے قبضہ سے ایک کروڑ روپئے سے زائدمالیتی 1,761 گرام سونا ضبط